काठमाडौं भित्र गुड्न थाले बिजुली माइक्रो, पुराना विस्थापित गर्दा प्रदूषण नियन्त्रणसँगै डिजेल खर्च जोगिने
कात्तिक २६, २०८० १६:३
काठमाडाैं । चौधरी ग्रुप आन्तर्गत सीजी मोटर्स प्रालिले बिक्री वितरण गर्दै आइरहेको किङलङ ब्रान्डका विद्युतीय माइक्रो बसहरू काठमाडौंका विभिन्न रुटहरूमा समेत गुड्न थालेका छन् । काठमाडौंदेखि बाहिरी जिल्लाहरूमा प्रयोग भइरहेका विद्युतीय माइक्रोबस राजधानी भित्र समेत चल्न थालेका हुन् ।
सीजी मोटर्सले विभिन्न यातायात व्यवसायी मातहत विद्युतीय माइक्रोबस सञ्चालनमा आएको जानकारी दिएको छ । बागमती प्रदेश सरकारको नीति तथा महानगरपालिकाको अवधारणा अनुसार पुराना डिजेल र ग्यासबाट चल्ने सार्वजनिक यातायातलाई विस्थापित गरेर नयाँ विद्युतीय सार्वजनिक यातायात चलाउन थालिएको हो ।
एउटा डिजेल माइक्रो बसले दैनिक १५०-२०० किमि चल्दा पाँच हजारदेखि सात हजार रुपैयाँसम्मको डिजेल खपत गरिरहेको हुन्छ । त्यस हिसाबले काठमाडौंभित्र सञ्चालनमा रहेका तीन हजार डिजेल माइक्रोबस विस्थापित हुँदा दैनिक दुई करोड १० लाख रुपैयाँको डिजेल खर्च विस्थापित हुन सक्ने अनुमान गरिएको छ ।
विद्युतीय सवारी साधनको ब्याट्री र वारेन्टी डिजेल सवारीको तुलनामा दोब्बर रहेको छ । प्रदूषण रहित सार्वजनिक सावरी साधन भएकाले यसलाई अबको विकल्पको रूपमा हेर्न थालिएको छ र सरकारले समेत प्रोत्साहन दिन थालेको छ ।
सीजी मोटर्स प्रालिले बिक्री वितरण गर्दै आइरहेको किङलङ माइक्रो बस १४ र १९ सिटर गरी दुई मोडेल उपलब्ध छन् । ब्याट्री निर्माण कम्पनी सीएटीलले बनाएको ब्याट्री प्रयोग भएको यो गाडीले एक पटकको फुल चार्जमा ३०० किमि रेञ्ज दिने बताइएको छ ।
१८० मिलिमिटर ग्राउन्ड क्लियरेन्स भएको किङलङ ईभी नेपालको बाटो र माटो सुहाउँदो समेत रहेको छ । हरेक पाँच ओटा गाडीमा एउटा फास्ट चार्जर दिंदै आएको समेत कम्पनीले जनाएको छ ।
जसअनुसार नेपालभर ३० भन्दा बढी स्थानमा फास्ट चार्जर स्थापना भइसकेका छन् र अन्य ५० भन्दा धेरै ठाउँमा चार्जर जडान गर्ने लक्ष्य रहेको कम्पनीले जनाएको छ ।
काठमाडौंमा तीन ठाउँबाट सर्भिसिङ सुविधा लिन सकिने किङलङ ईभीका लागि रिङ्गरोडमा हरेक पाँच किमि दुरीमा एउटा चार्जर राख्ने अन्तिम तयारीमा कम्पनी पुगेको छ । यो गाडीका लागि ८० प्रतिशतसम्म कर्जा सुविधा रहेको र नेपालभरका सम्पूर्ण बैंकहरूबाट सुलभ कर्जा सुविधा लिन सकिने कम्पनीले उल्लेख गरेको छ ।
पछिल्लो अध्यावधिक: कात्तिक २६, २०८० १६:३
