अब नेपाली नागरिकता देखाएरै भारतमा सिमकार्ड किन्न पाइने
फागुन ८, २०८० ११:४१
काठमाडौं । अब नेपाली नागरिकहरूले भारतमा सहज रूपमा भारतीय सिमकार्ड लिन पाउने भएका छन् । भारतको सञ्चार मन्त्रालय अन्तर्गतको दूरसञ्चार विभागले नेपाल र भुटानका नागरिकहरूका लागि सिमकार्डको केवाईसी इन्स्ट्रक्सन संशोधन गर्दै यस्तो व्यवस्था ल्याएको हो ।
योसँगै अब नेपालबाट सिधै भारतमा जाने नेपालीहरूले आफ्नो राहदानी, मतदाता परिचय पत्र वा दूतावासले जारी गरेको परिचयपत्रको आधारमा भारतको सिम लिन सक्नेछन् । यद्यपि नेपालबाहेक अन्य स्थानबाट भारतमा प्रवेश गर्दा वैध भिसा र टिकटसहितको राहदानी अनिवार्य देखाउनु पर्नेछ ।
भारतका लागि नेपाली राजदूत डा. शंकरप्रसाद शर्माले भारतमा नेपालीहरूले सिमकार्ड लिन सास्ती भोग्नुपरेको भन्दै यसको अन्त्यका लागि औपचारिक अनुरोध गरेपछि केही हप्तामै भारतको विदेश मन्त्रालय र सञ्चार मन्त्रालयले यस्ताे कदम चालेको बताएका छन् ।
Great news! Nepali nationals can now obtain a SIM card on the basis of their passport, Citizenship Certificate, voter's ID, or ID issued by the Embassy. Citizens of🇳🇵were denied a SIM card earlier due to technical reasons.
— Dr. Shankar P Sharma (@DrShankarSharma) February 20, 2024
Our request was processed quickly by MEA and the MoC, 🇮🇳 pic.twitter.com/ohPLyApIv1
सिम कार्डको भ्यालिडिटी भने बसाइँ अवधि वा भिसा वैधतामा सीमित हुने बताइएको छ । यसअन्तर्गत भारतमा लामो समयसम्म बस्ने भएपनि एक पटकमा सिमकार्डको भ्यालिडिटी अधिकतम तीन महिनासम्मको हुनेछ ।
यस्तो सिममा अन्तर्राष्ट्रिय रोमिङ अनुमति हुनेछैन । साथै अपरेटरहरूले भारतीय नियामकसँग सिमकार्डका ग्राहकहरूको विवरण पेश गर्नुपर्छ ।
पछिल्लो अध्यावधिक: फागुन ८, २०८० १२:१
