अब गुगल मिटको भिडिओ कन्फ्रेन्समा एआईले चाहे जस्तै ब्याकग्राउन्ड बनाइदिने
कात्तिक २६, २०८१ १८:५९
काठमाडौं । अब भिडिओ कन्फ्रेन्सिङ एप गुगल मिटमा समेत एआईमा आधारित ब्याकग्राउन्ड जेनेरेसन फिचर थपिने भएको छ । वेब संस्करणमा आइसकेको यो फिचर अब एन्ड्रोइड प्रयोगकर्ताहरूका लागि पनि उपलब्ध हुने भएको हो ।
एन्ड्रोइड अथोरिटीका अनुसार यस फिचर गुगल मिटको परीक्षणकालमा रहेको नयाँ भर्सनमा भेटिएको छ । प्रयोगकर्ताहरूले इफेक्ट्स मेनुभित्र ‘जेनेरेट अ ब्याकग्राउन्ड’ विकल्प मार्फत् यो सुविधा प्रयोग गर्न सक्नेछन् ।
यस फिचरको मुख्य काम भनेको प्रयोगकर्ताहरूले आफ्नो इच्छा अनुसारको ब्याकग्राउन्ड बनाउन टेक्स्ट प्रोम्प्ट लेख्न सक्नु हो । प्रयोगकर्ताले मिटिङ सुरु हुनु अघि वा मिटिङको बिचमा प्रोम्प्टमार्फत ब्याकग्राउन्ड तयार पार्न सक्ने छन् ।
मिटमा ब्याकग्राउन्ड तयार पार्न गुगलको जेमिनाई एआई मोडेल प्रयोग हुनेछ । यसअन्तर्गत फोटोग्राफी, साइन्स फिक्सन, इलुस्ट्रेसन, थ्रिडी एनिमेसन, फेन्टासी जस्ता थिममा ब्याकग्राउन्ड तयार हुनेछ ।
वेबमा भने यो फिचर वर्कस्पेस ल्याब्स अन्तर्गत रहेको छ । एन्ड्रोइडमा यो फिचर के कसरी आउँछ भन्ने बारेमा थप बताइएको भने छैन ।
पछिल्लो अध्यावधिक: कात्तिक २६, २०८१ १८:५९
