चैत २०, २०८१ १८:२५
काठमाडौं । चैत १५ गते तीनकुनेमा भएको राजावादी समर्थकहरूको प्रदर्शनका क्रममा राष्ट्रिय गान बज्दा स्टेजमा अश्रुग्यास हानेको भनिएको भिडिओ ‘डिपफेक’ भएको प्रहरीले दाबी गरेको छ । बुधबार आयोजित पत्रकार सम्मेलनमा प्रहरी प्रवक्ता डीआईजी दिनेश आचार्यले सामाजिक सञ्जालमा भाइरल भिडिओको सत्यतामा प्रश्न उठाए ।
राजावादीको कार्यक्रम सुरु हुनुअघि अश्रुग्यास प्रहार भएको भन्ने दाबी गलत भएको उनको भनाइ थियो । “कार्यक्रम सुरू हुनुभन्दा अगाडि राष्ट्रिय गान बज्दा टियर ग्यास हानेको भन्ने होइन । त्यो डिपफेक भिडिओ हो,” डीआईजी आचार्यले भने ।
सामाजिक सञ्जालमा राष्ट्रिय गान बजिरहँदा प्रहरीले अश्रुग्यास प्रहार गरेको भन्दै आएका भिडिओहरू र विभिन्न समाचार मिडियाले खिचेका फुटेजहरू साथै घटनास्थलका सीसीटिभी फुटेजहरू संकलन गरी अनुसन्धान गर्दा स्टेजबाट कार्यक्रम सुरु नै नभएको पाइएको उनले बताए ।
कार्यक्रम सुरु हुनुभन्दा अगाडि नै एक व्यक्तिले त्यहाँ जम्मा भएका मानिसहरूलाई निषेधित क्षेत्रतर्फ जान उक्साएको भिडिओमा देखिने भन्दै उनले भने, “प्रहरीले हिंसा सुरु गरेको होइन । त्यहाँ कार्यक्रम सुरु नै नभइ राष्ट्रिय गान कसरी बज्छ, नेताहरू पनि थिएनन् । तर त्यहाँ एकजना व्यक्तिले हामी यहाँ बस्ने होइन उता जानुपर्छ बानेश्वर भनेको चाहिँ थियो ।”
एउटा अश्रुग्यास एक ठाउँबाट अर्को ठाउँमा पुग्नसक्ने उनले उल्लेख गरे । साथै प्रहरीको उद्देश्य स्टेजलाई लक्षित गर्नु नभएको उनले दाबी गरे ।
“स्टेजबाट सुरुमा के भएको थियो भन्ने कुनै पनि स्पष्ट अवस्था थिएन । तर, स्टेजबाट मान्छेहरूलाई भड्काएर 'अब हामी बानेश्वर कब्जा गर्न जानुपर्छ, हामी यहाँ बस्ने उद्देश्यले आएका होइनौं' भन्ने किसिमको घोषणा गरिएको थियो ।...त्यसपछि, अवस्था यतातिर आएपछि पुलनेर गएर झडप (कन्फ्रन्टेसन) भएको थियो । सोही झडपको क्रममा अश्रुग्यास प्रयोग गरिएको थियो । त्यही अश्रुग्यासको केही भाग स्टेजसम्म पुगेको हुन सक्छ,” उनले भने ।
*शीर्षक सच्याइएको छ । स.
पछिल्लो अध्यावधिक: चैत २२, २०८१ १४:३
