एभिन्युजले सार्वजनिक गर्यो आगजनीमा परेर मृत्यु भएका फोटोपत्रकार सुरेश रजकको अन्तिम मेसेज
चैत २३, २०८१ १३:१४
काठमाडौं । एभिन्युज टेलिभिजनले राजावादी आन्दोलनको क्रममा आगजनीमा परेर मृत्यु भएका फोटो पत्रकार सुरेश रजकको अन्तिम मेसेज सार्वजनिक गरेको छ । शुक्रबार वेबसाइटमा रजकको अन्तिम मेसेज भन्दै एभिन्युजले भाइबर च्याटको स्क्रिनशट बाहिर ल्याएको हो ।
स्क्रिनशटमा रजकले ‘माथि पुलिस लुकिरा’छ’, ‘उनीहरूलाई हान्न जानलाछ’, ‘कल गर्नु त’, ‘नेटवर्कले काम गरिराछैन..’, ‘फोन उठाको हो बट’, ‘नेटवर्कले उठाले गरेर उठ्दैन के गर्ने ?’ लगायतका टेक्स्ट पठाएको देखिन्छ ।
एभिन्युजका अनुसार १५ चैतमा राजावादी समर्थकले गरेको प्रदर्शनका क्रममा सो घटनाको प्रत्यक्ष प्रसारण गर्न तीनकुने पुगेका रजकले २ बजेर ३१ मिनेटसम्म मास्टर कन्ट्रोल रूममा सम्पर्क गरेका थिए ।
एभिन्युजले लेखेको छ, “आगलागी भएको घरको चौथो तलामा पुगेका सुरेशले २ बजेर १९ मिनटमा म्यासेज गरेका थिए । ‘माथि पुलिस छ, उनीहरूलाई हान्न जान लागेको छ,’ उनको मेसेजमा लेखिएको थियो ।”
रजकको साथमा भएका दुई ओटा फोन र एउटा भिडिओ क्यामेरामध्ये फोन जलेको अवस्थामा भएको र क्यामेरा र अर्को फोन गायब भएको एभिन्युजले दाबी गरेको छ ।
एभिन्युज टेलिभिजनले सार्वजनिक गरेका दुई ओटा स्क्रिनशट अहिले सामाजिक सञ्जालमा भाइरल भइरहेका छन् ।
पछिल्लो अध्यावधिक: चैत २३, २०८१ १३:४०
