उत्तराखण्ड सरकारले बनायो भूकम्प अघि नै चेतावनी दिने भारतकै पहिलो मोबाइल एप 'भूदेव'
चैत २६, २०८१ १८:४३
काठमाडौँ । उत्तराखण्ड प्रदेश सरकारले भारतकै पहिलो भूकम्प जानुअघि चेतावनी दिने मोबाइल एप तयार पारेको छ । उत्तराखण्ड विपद् व्यवस्थापन प्राधिकरण र आईआईटी रुड्कीको संयुक्त प्रयासमा भूदेव नामक भूकम्प पूर्व सूचना दिने एप सार्वजनिक गरिएको हो ।
यो एपले ५ रेक्टर स्केल वा त्यसभन्दा माथिको तीव्रता भएका भूकम्प आउनुअघि नै अलर्ट दिने दाबी गरिएको छ । उत्तराखण्डका मुख्यमन्त्री पुष्करसिंह धामीले यो एप सुरुवात गरेका हुन् । अहिलेसम्म उक्त राज्यमा १७७ सेन्सर तथा १९२ साइरन जडान भइसकेको उल्लेख छ ।
चाँडै नै थप ५०० सेन्सर र १००० साइरन जडान गरिने बताइएको छ । उत्तराखण्ड सरकारले आफ्नो प्रदेशका जनतालाई यो मोबाइल एप अनिवार्य रूपमा डाउनलोड गर्न आग्रह समेत गरेको छ ।
पछिल्लो अध्यावधिक: चैत २६, २०८१ १८:४३
