गुगलले इन्स्टाग्राम किन्ने डरले जुकरबर्ग रातभर सुत्न सकेनन्, यस्तो थियो उनको गोप्य ईमेल
बैशाख ९, २०८२ ११:६
काठमाडौँ । फेसबुकका संस्थापक मार्क जुकरबर्गले गुगलले इन्स्टाग्राम किन्न सक्ने डर व्यक्त गरेको गोप्य ईमेल सार्वजनिक भएको छ । अमेरिकी अदालतमा प्रतिस्पर्धा ऐन उल्लङ्घनसम्बन्धी मुद्दाको सुनुवाइ भइरहेका क्रममा संघीय व्यापार आयोग (एफटीसी) ले अदालतमा ती ईमेल प्रस्तुत गरेको हो ।
सन् २०११ र २०१२ मा पठाइएका ती आन्तरिक ईमेलमा जुकरबर्गले इन्स्टाग्राम मोबाइल एपको बजारमा तीव्र रूपमा बढिरहेको र यदि गुगलले यसलाई किन्यो भने आउने केही वर्षमा फेसबुकले प्रदान गरिरहेका जस्तै सेवाहरू सजिलै थप्न सक्ने चिन्ता व्यक्त गरेका छन् ।
सार्वजनिक ईमेलहरूमा जुकरबर्गले इन्स्टाग्रामको प्रयोगकर्ता संख्या र फोटो शेयरिङ सुविधामा भइरहेको तीव्र वृद्धिलाई नजिकबाट नियाल्नुपर्ने बताएका छन् ।
जुकरबर्गले २०११ को सेप्टेम्बरमा पठाएको ईमेलमा लेखेका छन्, “यदि इन्स्टाग्रामले मोबाइलमा यस्तै राम्रो गरिरह्यो वा गुगलले उनीहरूलाई किन्यो भने आउँदो केही वर्षमा उनीहरूले सजिलैसँग हाम्रो जस्तै सेवा थप्न सक्छन् । अनि यदि उनीहरूसँग धेरै मानिसहरूको फोटो जम्मा हुँदै गयो भने त्यो हाम्रो लागि ठूलो समस्या बन्छ । अहिले उनीहरू अत्यन्तै छिटो बढिरहेका छन् । जस्तो लाग्छ, हरेक दुई–तीन महिनामा उनीहरूको प्रयोगकर्ता संख्या दोब्बर भइरहेको छ र अहिले नै उनीहरूसँग झण्डै ५० देखि १० लाख प्रयोगकर्ता छन् । जब हामीले राम्रो उत्पादन ल्याउँछौं, धेरै मानिसहरूले हाम्रो सेवा प्रयोग गर्नेछन् र भविष्यका इन्स्टाग्राम प्रयोगकर्ताहरूलाई त्यहाँ जान कुनै कारण नै रहने छैन । तर, अहिलेको गतिमा, हरेक केही महिनाको ढिलाइले उनीहरूको संख्या दोब्बर गराइरहेको छ र हाम्रो लागि स्थिति झन् अप्ठ्यारो बनाइरहेको छ ।”
त्यसअघि सन् २०११ को फेब्रुअरीमा उनले इन्स्टाग्रामले चार महिनामै २० लाख प्रयोगकर्ता र दैनिक ३० हजार फोटो अपलोडको आँकडा पार गरेकोमा आश्चर्य व्यक्त गरेका थिए । उनले लेखका छन्, “इन्स्टाग्राम छिट्टै बढिरहेको जस्तो देखिन्छ । चार महिनामा उनीहरूका २० लाख प्रयोगकर्ता र दैनिक ३० हजार फोटो अपलोड भएका छन् । यो धेरै हो । हामीले यसलाई नजिकबाट नियाल्नुपर्छ । साथै, स्पष्ट रूपमा ड्रपबक्सको अर्को ठुलो योजना फोटो शेयरिङमा हुनेछ ।”
यसबाहेक, अदालतमा पेश गरिएको दस्तावेज अनुसार जुकरबर्गले प्रतिस्पर्धी एपहरूलाई किनेर बजारमा अरू प्रतिस्पर्धीलाई ठुलो हुनबाट रोक्ने रणनीति समेत बनाएका थिए । इन्स्टाग्रामलाई किन्ने निर्णय पनि त्यही रणनीतिक सोचको हिस्सा रहेको एफटीसीको ठहर छ ।
फेसबुकले इन्स्टाग्रामलाई प्रतिस्पर्धीको रूपमा हेर्दै सन् २०१२ मा एक अर्ब अमेरिकी डलरमा खरिद गरेको थियो ।
अमेरिकी सरकारले मेटा (तत्कालीन फेसबुक) माथि प्रतिस्पर्धा कानुन उल्लङ्घन गर्दै सम्भावित प्रतिस्पर्धीहरूलाई किनेर बजार कब्जा गर्ने रणनीति अपनाएको आरोप लगाएको छ । एफटीसीले अदालतमा मेटालाई इन्स्टाग्राम र ह्वाट्सएपजस्ता एपहरू बिक्री गर्न बाध्य पार्नुपर्ने माग राख्दै मुद्दा दायर गरेको छ । जुकरबर्गको यो गोप्य ईमेलले मुद्दालाई थप रोचक मोड दिएको छ ।
-विभिन्न अन्तर्राष्ट्रिय सञ्चारमाध्यमको सहयोगमा
पछिल्लो अध्यावधिक: बैशाख ९, २०८२ ११:२४
