९,००० एमएएच ब्याट्रीसहितको नयाँ स्मार्टफोन ल्याउँदै अनर

काठमाडौँ । चिनियाँ स्मार्टफोन ब्रान्ड अनरले ९,००० एमएएच क्षमताको ब्याट्रीयुक्त स्मार्टफोन बजारमा ल्याउने तयारी गरेको छ । चिनियाँ टिपस्टर ‘डिजिटल च्याट स्टेसन’का अनुसार उक्त स्मार्टफोनमा सिलिकन-कार्बन (Si/C) प्रविधिको ब्याट्री प्रयोग गरिनेछ ।

यसअघि यस वर्ष विभिन्न ब्रान्डहरूले सिलिकन-कार्बन ब्याट्रीसहितका स्मार्टफोन सार्वजनिक गरिसकेका छन् । फलस्वरूप, अहिले ६,००० एमएएच भन्दा माथिको ब्याट्री भएका स्मार्टफोनहरू बजारमा सामान्य बन्दै गएका छन् । अनरले केही महिनाअघि मात्रै ७,२०० एमएएच क्षमताको अनर जीटी प्रो (Honor GT Pro) नामक मोडेल बजारमा ल्याएको थियो ।

प्राप्त जानकारीअनुसार नयाँ ९,००० एमएएच ब्याट्री फोनलाई स्न्यापड्रागन सिरिजको फ्ल्यागशिप चिपले पावर दिनेछ । यद्यपि, यो स्न्यापड्रागन ८ एलिट जेन ५ हो वा स्न्यापड्रागन ८ जेन ५ भन्ने विषयमा स्पष्टता छैन ।

हालसम्म अनरले यसबारे औपचारिक जानकारी दिएको छैन । तर कम्पनीले नयाँ म्याजिक ८ सिरिज स्मार्टफोन र केही नयाँ ट्याबलेट सार्वजनिक गर्ने तयारी गरेको छ । तीमध्ये एक ट्याबलेट स्न्यापड्रागन ८ एलिट जेन ५ चिपसेटद्वारा सञ्चालित हुने बताइएको छ ।

पछिल्लो अध्यावधिक: असोज ३०, २०८२ २३:४

टिप्पणीहरू