कन्टेन्ट क्रियटरलाई युट्युबले भन्दा धेरै पैसा दिने गरी नयाँ पेआउट योजना ल्याउने तयारीमा एक्स

काठमाडौँ । टेस्ला, स्पेसएक्स, स्टारलिङ्क जस्ता कम्पनीका प्रमुख एलन मस्कले आफ्नो सामाजिक सञ्जाल प्लेटफर्म एक्स (ट्वीटर) मा कन्टेन्ट क्रियटरहरूलाई युट्युबको तुलनामा बढी पारिश्रमिक दिने सङ्केत दिएका छन् । डिजिटल प्लेटफर्महरूबिच सक्कली, मानव-सिर्जित र आधिकारिक कन्टेन्टहरू जोगाउन प्रतिस्पर्धा चलिरहेका बेला मस्कको यो धारणा सार्वजनिक भएको हो ।

एक प्रयोगकर्ताले क्रियटरहरूलाई बढी भुक्तानी दिनुपर्ने माग गर्दै गरेको ट्वीटमा प्रतिक्रिया दिँदै मस्कले एक्सका हेड अफ प्रोडक्ट निकिता बियरलाई ट्याग गरेर भनेका छन्, "ठीक छ, यो काम गरौँ । तर प्रणालीको दुरुपयोग नहुने गरी कडाइका साथ लागु गरौँ ।" जवाफमा निकिता बियरले आफूहरू यसमा काम गरिरहेको र ९९ प्रतिशत ठगीलाई हटाउने नयाँ विधि आफूहरूसँग रहेको बताएका छन् ।

if i were at x or elon, i’d crank creator payouts way way way way up. maybe even more than youtube (you can eat the cost to try to win agi).

because the platforms that actually pay will be the only ones that will have any authoritative content left once the llms finish eating…

— signüll (@signulll) December 30, 2025

यसअघि अक्टोबर महिनामा पनि एक्सले आफ्ना क्रियटरहरूलाई अन्डरपे (थोरै भुक्तानी) गरिरहेको र भुक्तानीको बाँडफाँड पर्याप्त रूपमा सही नभएको मस्कले स्वीकार गरेका थिए । गुगलको स्वामित्वमा रहेको युट्युबसँग तुलना गर्दै उनले युट्युबले धेरै राम्रो काम गरिरहेको भन्दै एक्सले आफ्नो भुक्तानी प्रणालीमा सुधार गर्नुपर्ने आवश्यकता औंल्याएका थिए । 

On it.

We have a new method that should wipe out 99% of fraud

— Nikita Bier (@nikitabier) December 30, 2025

हाल इन्टरनेटमा आर्टिफिसियल इन्टेलिजेन्स (एआई) को सहयोगमा सिर्जना गरिएका सामग्रीहरूको बाढी आइरहेको छ । यस्तो समयमा लार्ज ल्याङ्ग्वेज मोडेल (एलएलएम) ले समेत इन्टरनेटका सामग्रीहरू उपभोग गरिरहेका छन् । जसले गर्दा आधिकारिक र सक्कली सामग्री उत्पादन गर्ने क्रियटरहरूलाई उचित भुक्तानी दिने प्लेटफर्महरू मात्र टिक्न सक्ने तर्क प्रयोगकर्ताहरूले गरेका छन् ।

मस्कले ४४ अर्ब डलरमा ट्वीटर खरिद गरेपछि एक्समा भेरिफाइड प्रयोगकर्ताहरूका लागि विज्ञापन आम्दानी बाँडफाँड कार्यक्रम सुरु गरेका थिए । जुन 'इन्गेजमेन्ट' मा आधारित छ । तर, यो प्रणालीमा केही गम्भीर समस्याहरू पनि देखिएका छन् । जसमा भुक्तानीमा हुने ढिलाइ हुने, आम्दानीमा एकरूपता नहुने, मनिटाइजेसनका मापदण्ड स्पष्ट नभएको, बट र कृत्रिम रूपमा इन्गेजमेन्ट बढाएर प्रणालीको दुरुपयोग हुने जस्ता जोखिम  छन् ।

एक्स भिडिओ सेयर गर्न र बिना सेन्सरशिप धेरै मानिसमाझ पुर्‍याउन प्रभावकारी प्लेटफर्म भए तापनि आर्थिक रूपमा यसले युट्युबको एडसेन्ससँग प्रतिस्पर्धा गर्न नसकेको निक्की श्री नाम गरेका क्रियटरले बताएका छन् । क्रियटरहरूले एक्समा भन्दा अन्य प्लेटफर्ममा समय खर्चिनु आर्थिक रूपमा फाइदाजनक ठान्ने गर्छन् । जसका कारण एक्समा कन्टेन्ट पोस्ट गर्ने क्रियटरहरू तुलनात्मक रूपमा थोरै छन् । मस्कको यो पछिल्लो कदमले भने क्रियटरहरूलाई आकर्षित गर्ने र बट-प्रेरित कन्टेन्टलाई निरुत्साहित गर्ने लक्ष्य राखेको देखिन्छ ।

Yes this would be amazing, X so far hasn’t been able to compete with YouTube Adsense but is a much more effective platform for videos to be shared and seen by the masses without censorship. I’ve been telling my friends for months to be posting on X but they haven’t made the…

— Nick shirley (@nickshirleyy) December 30, 2025

पछिल्लो अध्यावधिक: पुस १६, २०८२ १८:२९

टिप्पणीहरू