हराएका व्यक्ति र बेवारिसे शवको विवरण अब अनलाइनमै हेर्न सकिने, प्रहरीले ल्यायो नयाँ पोर्टल
माघ ९, २०८२ ८:४
काठमाडौँ । नेपाल प्रहरीले विभिन्न प्रहरी कार्यालयहरूमा प्राप्त भएका हराएका तथा फेला परेका मानिसहरू र पहिचान नखुलेका तथा बेवारिसे शवहरूको विवरण अनलाइनमार्फत नै हेर्न सकिने व्यवस्था मिलाएको छ । सर्वसाधारणको सहजता र सूचनामा पहुँच पुर्याउने उद्देश्यले प्रहरीले यो डिजिटल प्रणाली कार्यान्वयनमा ल्याएको हो ।
प्रहरी प्रधान कार्यालयका अनुसार अब जोसुकैले पनि घरैमा बसेर हराएका आफन्तको खोजी वा फेला परेका अज्ञात व्यक्ति तथा शवहरूको बारेमा विस्तृत जानकारी लिन सक्नेछन् । यसअघि यस्ता विवरणहरूका लागि सम्बन्धित प्रहरी कार्यालयमै पुग्नुपर्ने वा सम्पर्क गर्नुपर्ने बाध्यता थियो ।
तीन छुट्टाछुट्टै विधामा विवरण उपलब्ध
प्रहरीले विवरणहरूलाई व्यवस्थित बनाउन तीनवटा छुट्टाछुट्टै वर्गमा वर्गीकरण गरी अनलाइन पोर्टलमा राखेको छ:
१. हराएका व्यक्तिहरूका लागि: हराएका व्यक्तिहरूको विवरण हेर्नका लागि udb.nepalpolice.gov.np/missing लिंक वा उपलब्ध क्यूआर कोड स्क्यान गर्न सकिनेछ।
२. अलपत्र भेटिएका व्यक्तिहरूका लागि: कतै फेला परेका तर पहिचान नखुलेका वा अलपत्र अवस्थामा रहेका मानिसहरूको जानकारीका लागि udb.nepalpolice.gov.np/found मा जान सकिने व्यवस्था गरिएको छ।
३. पहिचान नखुलेका शवहरूका लागि: विभिन्न स्थानमा फेला परेका बेवारिसे तथा पहिचान खुल्न नसकेका शवहरूको विवरण udb.nepalpolice.gov.np/dead-bodies मार्फत सार्वजनिक गरिएको छ।
सूचनालाई अझ प्रविधिमैत्री बनाउन प्रहरीले प्रत्येक विधाका लागि छुट्टाछुट्टै क्यूआर कोड पनि जारी गरेको छ । सर्वसाधारणले आफ्नो मोबाइलबाट ती कोड स्क्यान गरी सिधै सम्बन्धित विवरण भएको वेबपेजमा पुग्न सक्नेछन् ।
पछिल्लो अध्यावधिक: माघ ९, २०८२ ८:१४
