बिना फोन नम्बर र विज्ञापन चलाउन मिल्ने एक्सच्याट ल्याउँदै एलन मस्क, देला ह्वाट्सएपलाई चुनौती ?

काठमाडौँ । एलन मस्कको बहुप्रतिक्षित मेसेजिङ एप 'एक्सच्याट' आउने निश्चित भएको छ । आईफोन र आईप्याड प्रयोगकर्ताहरूका लागि यो एप आगामी बिहीबार (१७ अप्रिल, २०२६) देखि पूर्ण रूपमा सञ्चालनमा आउने बताइएको छ ।

मस्कले यो एपलाई एक 'सुपर-एप' को रूपमा विकास गर्ने आफ्नो दीर्घकालीन योजनाको एउटा महत्त्वपूर्ण कडीको रूपमा प्रस्तुत गरेका छन् । एक्सच्याट मुख्य 'एक्स' (ट्वीटर) प्लेटफर्मभन्दा छुट्टै एउटा स्वतन्त्र (Standalone) एप हो । यो एप प्रयोग गर्नका लागि फोन नम्बरको आवश्यकता पर्दैन, जुन प्राइभेसी चाहने प्रयोगकर्ताका लागि एउटा ठुलो आकर्षण हो ।

Your encrypted chats deserve their own app.

Pre-order now: https://t.co/TM8Lk7AMGV pic.twitter.com/ZJ3yROXK1t

— XChat (@chat) April 10, 2026

मस्कले यसलाई 'इन्ड-टु-इन्ड इन्क्रिप्टेड' भएको दाबी गरेका छन् । उनले यसको सुरक्षालाई 'बिटकोइन-शैलीको इन्क्रिप्सन' भनेर चर्चा गरेका छन् ।भर्खरै सार्वजनिक गरिएको अपडेट अनुसार एक्सच्याटमा भ्वाइस नोट्सको सुविधा पुनः फिर्ता ल्याइएको छ । प्रयोगकर्ताले च्याट बक्सको दायाँपट्टि रहेको भ्वाइस आइकन थिचेर अडियो सन्देश पठाउन सक्छन् । थिचेर माथितिर स्वाइप (Swipe up) गरेपछि बटन नथिची पनि रेकर्ड गर्न सकिन्छ ।

यसमा मेसेज एडिट गर्ने, दुवै तर्फबाट डिलिट गर्ने र ५ मिनेटको समय राखेर मेसेज आफैँ हराउने (Disappearing) सुविधा पनि छ । यसको ग्रुप च्याटमा ४८१ जनासम्म सदस्य राख्न सकिनेछ । यसमा अडियो र भिडिओ कल, फाइल शेयरिङ र स्क्रिनशट ब्लक गर्ने लगायतका सुविधाहरू छन् । च्याटभित्रै विभिन्न कार्यहरू गर्नका लागि एक्सको आफ्नै ग्रोक एआई एकीकृत गरिएको छ ।

यो एप 'रस्ट' (Rust) प्रोग्रामिङ ल्याङ्ग्वेजमा निर्माण गरिएको छ । यसको साइज १७५.८ एमबी रहेको छ भने यसलाई चलाउन आईओएस १६ वा सोभन्दा पछिल्लो भर्सन आवश्यक पर्छ । एपलाई १७+ उमेर रेटिङ दिइएको छ । एन्ड्रोइड प्रयोगकर्ताका लागि यो एप कहिले उपलब्ध हुन्छ भन्नेबारे हालसम्म कुनै आधिकारिक पुष्टि भइसकेको छैन ।

एप सार्वजनिक भएसँगै यसका केही दाबीहरूमाथि प्रश्न उठ्न थालेका छन् । सुरक्षा अनुसन्धानकर्ताहरूले मस्कले प्रयोग गरेको 'बिटकोइन-शैलीको इन्क्रिप्सन' भन्ने शब्दावलीमाथि आपत्ति जनाएका छन् । उनीहरूका अनुसार बिटकोइनले लेनदेन प्रमाणित गर्न पब्लिक-की क्रिप्टोग्राफी प्रयोग गर्छ, जुन निजी मेसेज सुरक्षित राख्ने 'सिग्नल' जस्तो स्थापित ईटुई (E2E) मापदण्डभन्दा प्राविधिक रूपमा फरक र भ्रमपूर्ण छ ।

मस्कले यो एपमा 'जिरो ट्र्याकिङ' हुने दाबी गरे पनि एप्पलको एप स्टोरको प्राइभेसी कार्डले फरक तथ्य देखाएको छ । एप स्टोरका अनुसार एक्सच्याटले प्रयोगकर्ताको लोकेसन, सम्पर्क जानकारी, सर्च हिस्ट्री र प्रयोगकर्ताको पहिचानसँग जोडिने अन्य पहिचानकर्ताहरू (Identifiers) सङ्कलन गर्छ ।

हालसम्म कुनै पनि स्वतन्त्र तेस्रो पक्षले यो एपको सुरक्षा परीक्षण (Security audit) गरेको छैन । त्यसैले यसका प्राइभेसीका प्रतिबद्धता हालका लागि केवल कम्पनीको दाबीमा मात्र सीमित छन् ।

एलन मस्कले जो रोगनको पोडकास्टमा कुरा गर्दै एक्सच्याटको लक्ष्य सबैभन्दा सुरक्षित प्रणाली हुनु भन्दा पनि 'सबैभन्दा कम असुरक्षित मेसेजिङ प्रणाली' हुनु रहेको बताएका छन् । हाल एक्ससँग ५० करोडभन्दा बढी मासिक सक्रिय प्रयोगकर्ताहरू छन्, त्यसैले एक्सच्याटलाई प्रयोगकर्ताको आधार बनाउन शून्यबाट सुरु गर्नुपर्ने छैन ।

यो एप मस्कको 'एभ्रिथिङ एप' बनाउने सपनाको एउटा पाटो हो । उनले यसअघि नै 'एक्स मनी' नामक भुक्तानी सेवाको पनि छुट्टै एपको रूपमा परीक्षण भइरहेको जानकारी दिएका थिए । एक्सच्याटको आगमनले सिग्नल र ह्वाट्सएप जस्ता स्थापित एपहरूलाई कत्तिको चुनौती दिन्छ, त्यो भने हेर्न बाँकी नै छ ।

पछिल्लो अध्यावधिक: चैत ३०, २०८२ १३:७

टिप्पणीहरू