पब्जी मोबाइल नेसनल च्याम्पियनशिपमा आज सेमिफाइनलको अन्तिम खेल चल्दै, यसरी हेर्नुहोस् लाइभ
पुस १, २०७९ १८:२६
काठमाडौं । पब्जी मोबाइल नेसनल च्याम्पियनशिप (पीएमएनसी) नेपाल २०२२ अन्तर्गत आज सेमिफाइनल चरणको अन्तिम दिनको खेल हुँदैछ । प्रतियोगितामा सेमिफाइनल पुगेका ३२ नेपाली टिमलाई चार समूहमा बाँडेर राउन्ड रोबिन फर्म्याटमा सेमिफाइनलका खेल भइरहेका छन् ।
सेमिफाइनलको दुई दिनको १२ खेल सकिँदा ‘जेएम एकेडेमी’ ३५ एलिमिनेसन र एक चिकेन डिनरसहित कुल ७७ पोइन्ट ल्याएर अङ्क तालिकाको पहिलो स्थानमा रहेको छ । त्यस्तै दोस्रो स्थानमा रहेको ‘इलुमिनेट क्रु’ले ७७ पोइन्ट नै ल्याएर जेएम एकेडेमीलाई पछ्याइरहेको छ ।
त्यस्तै ७० पोइन्ट ल्याएर तेस्रो स्थानमा ‘लर्डएक्स अफिसियल’ छ । आजको छ खेलपछि कुन टिमले फाइनल खेल्ने भन्ने टुङ्गो लाग्नेछ । सेमिफाइनलको अङ्क तालिकाको शीर्ष १३ भित्र पर्ने टिमले अफलाइन फाइनल (ल्यान) खेल्नेछन् ।
अन्तिम चरणको खेल डिसेम्बर २१ र २२ मा हुनेछ, जसमा सेमिफाइनलको अङ्क तालिकाको शीर्ष १३ मा रहेका टिम र तीन आमन्त्रित टिम गरी कुल १६ टिमले प्रतिस्पर्धा गर्नेछन् । आमन्त्रित टिममा ‘विजेज क्लब’, ‘ज्यानमारा ई-स्पोर्ट्स’ र ‘द अट्रयाक्स ई-स्पोर्ट्स रहेका छन् ।
यो प्रतियोगिताको कुल पुरस्कार राशि ३० हजार अमेरिकी डलर (करिब ४० लाख नेपाली रुपैयाँ ) राखिएको छ, जसमध्ये विजेताले १० हजार डलर (करिब १३ लाख नेपाली) हात पार्नेछन् । त्यस्तै दोस्रो हुने टिमले पाँच हजार डलर (करिब साढे छ लाख नेपाली) र तेस्रो हुने टिमले ३५ सय डलर (करिब साढे चार लाख नेपाली) पाउनेछन् ।
साथै यो प्रतियोगितामा शीर्ष तीनभित्र रहने टिमले ‘पब्जी मोबाइल प्रो लिग साउथ एसिया स्प्रिङ २०२३’ मा स्थान बनाउनेछन् ।
यसरी हेर्नुहाेस् लाइभ
पछिल्लो अध्यावधिक: पुस १, २०७९ १८:२६
