काठमाडौं । टिकटकका सीईओ केभिन मेयरले आफ्नो पदबाट राजीनामा दिएका छन् । तीन महिनाको छोटो कार्यकालमै केभिनले पदबाट राजीनामा दिएका हुन् ।
आफ्नो कारोबारमाथि प्रतिबन्ध लगाएको आरोपमा अमेरिकी राष्ट्रपति डोनल्ड ट्रम्पमाथि मूद्दा दायर गरेको केही दिनमै केभिनले यस्तो कदम उठाएका हुन् ।
केभिन मेयर अमेरिकी नागरिक हुन् । केभिनको राजीनामासँगै कम्पनीले अमेरिकी जनरल म्यानेजर भानेस्सा पप्पासलाई अन्तरिम सीईओको रुपमा नियुक्त गरेको छ । पप्पास सन् २०१९ मा अमेरिकी जनरल म्याेजरको रुपमा टिकटकमा आबद्ध भएकी थिइन् ।
केभिन गत जुन १ मा टिकटकमा सीईओको रुपमा प्रवेश गरेका थिए । कम्पनीमा आउनु अघि उनी वाल्ट डिज्नी कम्पनीको डीआईएसएन टप स्ट्रिमिङ एक्जिक्युटिभ थिए ।
टिकटकले आफ्नो ईमेल वक्तव्य मार्फत केभिनको राजीनामा पुष्टि गर्नुका साथै पप्पासको अन्तरिम मनोनयनको घोषणा गरेको हो । बाइटड्यान्सका संस्थापक तथा सीईओ झाङ यिमिङले टिकटकले विश्वभर सामना गरिरहेको मुद्दा (विशेषगरी अमेरिका र भारतमा) त्यसको हल चाँडै निकाल्न लागि परेको बताएका छन् ।