महावीर पुन– त्रिभुवन विश्वविद्यालयको इन्स्टिच्युट अफ इन्जिनियरिङ (आईओई) अन्तर्गतका क्याम्पसमा पढ्ने भाइ बहिनीहरुलाई मैले नवीनतम् तथा नवप्रवर्तनात्मक परियोजना ल्याएर आविष्कार केन्द्रमा अनुसन्धान गर्न आग्रह गरेको थिएँ ।
तर उनीहरुले प्रोजेक्टको समय निकै थोरै भएको गुनासो सुनाए । उदाहरणको लागि आईओईको शैक्षिक क्यालेन्डरलाई नै लिनुहोस् ।
नेपालमा एक सेमेस्टर करिब ५ महिनाको हुँदो रहेछ । ३ महिना कक्षामा पढाईको लागि छुट्याइएको हुन्छ । बाँकी २ महिना जति जाँच गरेर बित्छ ।
जाँचको लागि भनेर करिब ४०/४५ दिन जति छुट्याइँदो रहेछ । नियमित विद्यार्थीहरुको एउट़ा विषयको जाँच भएपछि पढ्नको लागि कम्तिमा ३ दिनको ग्याप हुने देखियो । यसरी जाँचकै लागि २५ दिन जति लाग्दो रहेछ ।
अनि अघिल्लो सेमेस्टरहरुमा विभिन्न विषयमा फेल भएका विद्यार्थीहरुका लागि ब्याक पेपरको जाँच लिँदा १५ दिन जति लाग्छ । यसरी सेमेस्टरभर विद्यार्थीहरुका लागि प्रोजेक्टहरु गर्ने समय एकदमै कम हुन्छ ।
कुनै विद्यार्थी आफैंले केही प्रोजेक्टहरु गरेर समय बितायो भने त्यो विद्यार्थी जाँचमा फेल हुने सम्भावना धेरै हुने भयो । अनि हाम्रा विद्यार्थी कसरी इनोभेटर वा आविष्कारक बनुन् त ?
अमेरिकाको एउटा कलेजमा कसरी पढाई हुन्छ भन्ने कुराको उदाहरण हेर्न सक्नुहुन्छ । त्यहाँको जाँच लिने तरिका एकदमै भिन्न छ । एउटा सेमेस्टर चार महिनाको हुन्छ ।
पढाई पनि पुरै हुन्छ र पढाईकै क्रममा विषय शिक्षकले जाँच लिन्छन् । नेपालमा जस्तो जाँचका लागि भनेर महिनौंको समय खर्च गर्दैनन् ।
विषय शिक्षकले इञ्जिनियरिङ विद्यार्थीहरुलाई ८/१० वटा जति ‘प्रोब्लेम सेट’ दिन्छन् र त्यसको समाधान गर्न लगाउछन् । अन्य विषयका शिक्षकहरुले ८/१० वटा जति निबन्ध र पेपरहरु लेख्न दिन्छन् ।
प्रायः जसो हप्ताको अन्तिममा साप्ताहिक परीक्षा हुन्छ र बेला बेलामा क्विज पनि लिन्छन् । सेमेस्टरको मध्यतिर ‘मिड टर्म टेस्ट’ र अन्तिममा क्लासमै ‘फाइनल टेस्ट’ लिन्छन् ।
जाँचका लागि भनेर कुनै छुट्टै समय छुट्याइएको हुँदैन । कक्षाको हाजिरीलाई १० प्रतिशत नम्बरको रुपमा जोडिको हुन्छ । यसरी पेपर, क्विज, टेस्ट र हाजिर सबैको नम्बर जोडेर कक्षाको रिजल्ट निकाल्छन् ।
यसरी जाँच लिने तरिका युनिभर्सिटी अनुसार र शिक्षक अनुसार फरक फरक हुन्छ । तर नेपालमा १२ महिनामा चार महिना त विद्यार्थीहरुले जाँच दिएरै वित्ने रहेछ ।
यस्तो सिस्टमम सुधार गरे कसो होला ? अन्यथा यस्तो तरिकाले त हाम्रा विद्यार्थीहरुले कसरी इनोभेसन गर्न सक्लान ?