काठमाडौं । गत आइतबार एट्लान्टिक महासागरमा बेपत्ता भएको टाइटन पनडुब्बीको भग्नावशेष पानी बाहिर ल्याइएको छ । अमेरिकी तट रक्षकले एक विज्ञप्ति जारी गर्दै बुधबार पनडुब्बीको भग्नावशेष बाहिर ल्याइएको जानकारी दिएको हो ।
सय वर्षअघि दुर्घटनामा परेको विशाल टाइटानिक जहाजको भग्नावशेष हेर्न गत आइतबार (१८ जुन) पाँच जना यात्रुसहितको पनडुब्बीले यात्रा थालेको थियो । त्यसको एक घण्टा ४५ मिनेटमै सम्पर्क बिहिन बनेको थियो ।
अमेरिका र क्यानेडाका तटरक्षक सेना तथा उद्धारकर्ताले लगत्तै त्यसको खोजी कार्य सुरु गरेका थिए । खोजी कार्य सुरु भएको पाँचौं दिनमा पनडुब्बीको टुक्रा फेला परेपछि खोजीकार्य स्थगित गरी यात्रुको निधन भएको घोषणा गरिएको थियो ।
पनडुब्बीको भग्नावशेष फेला पार्न पानीभित्र रिमोट्ली अपरेटेड भेहिकल (आरओभी) पठाइएको थियो । उक्त आरओभीले फेला पारेको भग्नावशेष बुधबार बाहिर निकालिएको हो ।
तट रक्षकका अनुसार हालसम्म टाइटानिकको भग्नावशेष भएको ठाउँबाट १६०० फिट टाढा पनडुब्बीका पाँच ओटा ठूला टुक्राहरू भेटिएका छन् ।
सो पनडुब्बीको भग्नावशेषभित्र मानव अवशेष रहेको समेत बताइएको छ । ती मानव अवशेष अमेरिकी स्वास्थ्यकर्मीले विश्लेषण गर्ने विज्ञप्तिमा भनिएको छ ।
हाल सो घटनाको प्रारम्भिक अनुसन्धान भइरहेकाले त्यसबारे सम्पूर्ण जानकारी बाहिर आइसकेको छैन । फेला परेका प्रमाणहरू तट रक्षकको मरिन बोर्ड अफ इन्भेस्टिगेसन (एमबीआई) ले थप विश्लेषण र परीक्षणका लागि अमेरिकी बन्दरगाहमा पठाउने तयारी गरेको छ ।
एमबीआईका अध्यक्ष क्याप्टेन जेसन न्युबाउरले एक विज्ञप्तिमा भनेका छन्, “टाइटनको विनाशकारी क्षतिको कारणहरू बुझ्न र यस्तै त्रासदी फेरि दोहोरिन नदिने सुनिश्चित गर्न अझै धेरै काम गर्न बाँकी छ ।”
पनडुब्बीमा पाकिस्तानी मूलका ४८ वर्षीय ब्रिटिश धनाढ्य दाउद शाहजादा र उनका १९ वर्षीय छोरा सुलेमान, ५८ वर्षीय बेलायती अर्बपति हमिश हार्डिङ, ७७ वर्षीय अन्वेषक पल-हेन्री नार्गेओ र टाइटानिकसम्मको यात्रा गराउने ओसनगेट कम्पनीका प्रमुख कार्यकारी निर्देशक (सीईओ) ६१ वर्षीय स्टक्टन रश सवार थिए ।