आफ्नो एपमा कुरियर सेवा थप्दै पठाओ, ईकमर्स कम्पनीहरूको डेलिभरी पनि गर्ने
भदौ १३, २०८० १३:४५
काठमाडौं । नेपालकै प्रमुख राइड शेयरिङ तथा हेलिङ एप पठाओले अब कुरियर सेवा समेत दिने भएको छ । कम्पनीका प्रबन्ध निर्देशक अशिममानसिंह बस्न्यातले टेकपानासँगको विशेष कुराकानीमा उक्त योजना सुनाएका हुन् ।
उनका अनुसार चाँडै नै पठाओले आफ्नो प्लेटफर्ममा कुरियर सेवा थप गर्दैछ । “हामी नेपाली जनजीवनलाई सहज बनाउने प्रयासमा लागिपरेका छौं,” उनले भने, “पठाओको कुरियर सेवा सुरु भएपछि नेपालमा ईकमर्स कम्पनीहरूको सामान डेलिभरी सहज हुनेछ र उपभोक्ताले सस्तोमै सामान खरिद गर्न सक्नेछन् ।”
पठाओको कुरियर सेवा सबैजसो ईकमर्स कम्पनीहरूले प्रयोग गर्न सक्ने बस्न्यातको भनाई छ । यद्यपि यो सेवा कहिलेबाट सुरु हुन्छ भन्ने विषयमा भने कम्पनीले विस्तृत विवरण खुलाएको छैन ।
सन् २०१५ मा अमेरिकाबाट सुरु भएको पठाओको सेवा नेपालमा भने २५ सेप्टेम्बर २०१८ बाट सुरु भएको थियो । आउँदो ८ असोजमा पाँचौं वार्षिकोत्सव मनाउने तयारीमा रहेको कम्पनीले हाल कार तथा ट्याक्सी र मोटरसाइकलको राइड शेयरिङ एवम् हेलिङसँगै, खाना डेलिभरी, पार्सल र बजार सेवा दिंदै आएको छ ।
उपत्यका बाहिर चितवनमा भने कम्पनीले तीन पाङ्ग्रे अटो रिक्साको सेवा समेत आफ्नो एपमा जोडेको छ ।
पछिल्लो अध्यावधिक: भदौ १३, २०८० १३:५९
