प्राधिकरण अध्यक्ष खनालको राजीनामा स्वीकृत, कार्यवाहकको जिम्मेवारी नवराज अधिकारीलाई
पुस २४, २०८० १७:३०
काठमाडौं । सरकारले नेपाल दूरसञ्चार प्राधिकरणका अध्यक्षको पदबाट पुरुषोत्तम खनालले दिएको राजीनामा स्वीकृत गरेको छ । मंगलबार बसेको मन्त्रिपरिषद्को बैठकले खनालको राजीनामा स्वीकृत गर्ने निर्णय गरेको हो ।
साथै बैठकले रिक्त अध्यक्ष पदमा नियुक्तिका लागि सिफारिस गर्न मन्त्रालयका सचिवको संयोजकत्वमा समिति गठन गर्ने निर्णय पनि गरेको छ ।
रिक्त पदमा दूरसञ्चार नियमावलीको नियम ३ 'क' बमोजिम प्राधिकरण बोर्डका सदस्य नवराज अधिकारीलाई अर्को व्यवस्था नभएसम्मका लागि कार्यवाहक अध्यक्ष तोकिएको छ ।
खनालले मंगलबार बिहान सञ्चार तथा सूचना प्रविधि मन्त्री रेखा शर्मासमक्ष आफ्नो राजीनामा पेश गरेका थिए ।
पछिल्लो अध्यावधिक: पुस २५, २०८० ११:१२
