रहेनन् भारतीय चर्चित उद्योगपति रतन टाटा
असोज २४, २०८१ ७:३६
काठमाडौं । भारतका चर्चित उद्योगपति रतन टाटाको ८६ वर्षको उमेरमा निधन भएको छ । मुम्बईको एक अस्पतालमा बुधबार उपचारको क्रममा टाटाको मृत्यु भएको भारतीय सञ्चारमाध्यमले जनाएका छन् ।
रतन टाटाको निधनले भारतीय उद्योग क्षेत्रमा ठूलो क्षति पुर्याएको भन्दै प्रधानमन्त्री नरेन्द्र मोदीसहित अन्य प्रमुख नेताहरूले श्रद्धाञ्जली अर्पण गरेका छन् । रतनले टाटा समूहलाई अन्तर्राष्ट्रिय स्तरमा पुर्याउने क्रममा टाटा इन्डिका र टाटा नानो जस्ता महत्त्वपूर्ण उपलब्धिहरू हासिल गरेका थिए ।
उनको अन्त्येष्टि राजकीय सम्मानका साथ हुने बताइएको छ ।
रतन टाटाले भारतमै पहिलो पटक पूर्ण रूपमा कार उत्पादन सुरु गरेका थिए । उनको नेतृत्वमा टाटा समूहले १९९८ मा टाटा इन्डिका नामक कार लन्च गरेर भारतीय अटोमोबाइल क्षेत्रमा नयाँ युगको सुरुवात गरेको थियो ।
त्यसपछि २००८ मा विश्वकै सस्तो कार टाटा नानो बजारमा ल्याएर पनि उनी विश्वव्यापी चर्चाको विषय बनेका थिए । साथै ल्यान्ड रोभर, जगुआर जस्ता प्रतिष्ठित गाडी ब्रान्डहरू खरिद गरेर अन्तर्राष्ट्रिय बजारमा टाटा समूहको उपस्थिति थप बलियो बनाएका थिए ।
हालका उनको कम्पनी टाटा मोटर्सले विद्युतीय सवारी साधन (ईभी) उत्पादनमा पनि ठूलो प्रगति गरेको छ । कम्पनीले सन् २०२० मा टाटा नेक्सन ईभी सार्वजनिक गरेको थियो, जसले भारतसहित विभिन्न देशमा लोकप्रियता कमाएको छ । त्यसयता कम्पनीले टाइगर ईभी, टियागो ईभी, पन्च ईभी लगायतका मोडेल ल्याएको छ ।
उनको नेतृत्वमा टाटा समूहले सूचना प्रविधि क्षेत्रमा पनि महत्त्वपूर्ण योगदान पुर्याएको छ । यसअन्तर्गत टाटा कन्सल्टेन्सी सर्भिसेजले विश्वभर सफ्टवेयर विकास, आईटी कन्सल्टेन्सी, बिजनेस प्रोसेसिङ, क्लाउड कम्प्युटिङ, साइबर सुरक्षा, डेटा एनालिटिक्स लगायतका सेवा दिँदै आएको छ ।
रतनले १९९१ देखि २०१२ सम्म टाटा समूहको अध्यक्षको रूपमा सेवा गरे । यो अवधिमा टाटा समूहले अन्तर्राष्ट्रिय बजारमा महत्त्वपूर्ण प्रगति हासिल गरेको थियो । उनी सादगीपूर्ण जीवनशैलीका लागि पनि चिनिन्थे, जसका कारण उनलाई 'धर्मनिरपेक्ष जीवित सन्त' को रूपमा समेत मानिन्थ्यो ।
पछिल्लो अध्यावधिक: असोज २४, २०८१ ८:२२
