काठमाडौं । चीनमा हरेक वर्ष विवाह गर्ने जोडीहरूको संख्या घटिरहेको छ । सन् २०२४ को पहिलो तीन त्रैमासमा ४७ लाख विवाहको रेकर्ड गरिएको छ, जुन २०२३ को सोही अवधिको तुलनामा १६.६ प्रतिशतले कम हो ।
विवाहमा चिनियाँ युवाहरूको चासो कम हुँदै गएपनि डेटिङमा भने सक्रियता नघटेको चिनियाँ डेटिङ वेबसाइट जियायुआन दाबी गर्छ । उक्त वेबसाइटका अनुसार चिनियाँ युवतीहरूमा ‘मङ्की-लुकिङ म्यान’ निकै चर्चित छन् ।
चर्चित फिल्म लेजेन्ड अफ सन वुकोङ, मङ्की किङको प्रमुख बाँदर पात्रजस्तो चलाख र हास्यरसले भरिएका पुरुषहरूलाई युवतीहरूले बढी रुचाउने गरेका छन् ।
सोसल मिडियामा पुष्ट शरीर र ठूला आँखा भएका सेलिब्रेटीहरू बढी आकर्षक हुने गरेको भन्दै चर्चा हुने गरेको छ । सफल चिनियाँ अभिनेता वु लेई, अभिनेता एवम् गायक वाङ्ग हेडी, टक शो कलाकार फु ह्याङ जस्ता शरीरको बनावट भएका पुरुषलाई ‘मङ्की-लुकिङ म्यान’ भएको भन्दै चर्चा हुने गरेको छ ।
“मङ्की म्यानहरू हँसिलो हुने भएकाले त्यति गम्भीर नदेखिन सक्छन् । तर, चाहिएको बेला उनीहरू भरपर्दो साथी हुन्छन्,” चीनको चर्चित सोसल मिडिया प्लेटफर्म वेबोमा एक युवती लेख्छिन् । यस्ता पुरुषहरू उज्याला र उर्जावान देखिने गरेका छन् । साथै, उनीहरू सबैसँग घुलमिल हुने, कोमल मन भएका र बौद्धिक हुन्छन् ।
“उनीहरू जीवनमा सिरियस नहुने होइन । तर, उनीहरू सकारात्मक सोच राख्छन् । यस्ता पुरुषहरूसँग रहँदा म पनि बढी खुसी हुने गर्छु,” अर्की एक युवती लेख्छिन् ।
सांघाईकी २४ वर्षीय एक युवतीले चिनियाँ मिडियासँग आफ्नो प्रेमी मङ्की-म्यान भएको दाबी गर्छिन् । उनका प्रेमीले अक्सर उनलाई हँसाउँछन् भने आवश्यक परेको बेलामा गम्भीर पनि हुन्छन् । पछिल्लो समय नयाँ फ्ल्याटमा सर्दा सम्पूर्ण काम प्रेमीले सम्हालेको सुनाउँदै उनले आफ्नो प्रेमी मङ्की-म्यान भएको बताइन् ।
बेइजिङकी एक महिलाले आफू धेरै ब्लाइन्ड डेटमा जाँदा एउटा पनि पुरुष मन नपरेको, तर आफूलाई हँसाउन सक्ने पुरुष भेटेपछि उसैलाई डेट गरेको अनुभव साझा गर्छिन् ।
मङ्की-म्यानको पारिवारिक पृष्ठभूमि राम्रो हुने कतिपयले टिप्पणीसमेत गरेका छन् । कतिपयले पछिल्लो समयमा पैसा र वर्गभन्दा पनि मानिसहरू भावनात्मक र गुणस्तरीय जीवन बाँच्न चाहेकाले मङ्की-म्यान चर्चित भएको टिप्पणी गर्छन् ।
तर, सामाजिक सञ्जालमा युवकहरूको भने अनुभव फरक छ । एक युवकले भने, “स्वस्थ र आकर्षक व्यक्तिलाई सबैले मन पराउने भएकाले मङ्की म्यान चर्चित हुनु नौलो होइन ।’ अर्का एक पुरुष भन्छन्, ‘हामी केटाहरू कुनै पनि लेभल भिर्न तयार छैनौँ ।”