फोनपेको सीमापार भुक्तानी सेवाः एक वर्षमै डेढ अर्बको क्यूआर भुक्तानी
चैत ५, २०८१ २३:८
काठमाडौं । नेपालको डिजिटल भुक्तानी सेवाप्रदायक फोनपेले सीमापार यूपीआई क्यूआर कोडमार्फत पर्सन-टु-मर्चेन्ट (पीटुएम) कारोबारको एक वर्ष पूरा गरेको छ । भारतको नेसनल पेमेन्ट्स कर्पोरेसन अफ इन्डियाको अन्तर्राष्ट्रिय शाखा इन्टरनेसनल पेमेन्ट्स लिमिटेडसँग मिलेर फोनपेले मार्च २०२३ मा सीमापार यूपीआई भुक्तानी सेवा सुरु गरेको थियो ।
फेब्रुअरी २०२४ मा यूपीआई सेवा एकीकृत भएपछि फोनपेले नेपालका ६७ हजारभन्दा बढी व्यापारीहरूलाई डिजिटल भुक्तानी लिन सक्ने बनाएको छ । यस अवधिमा एक लाख २७ हजारभन्दा बढी भारतीय पर्यटकले मोबाइलमार्फत सहज, छिटो र सुरक्षित भुक्तानी गरेका छन् । एक वर्षभित्र फोनपे नेटवर्कमार्फत एक अर्ब ६० करोड रुपैयाँ (एक करोड २० लाख डलर) भन्दा बढीको कारोबार भएको छ ।
पछिल्लो वर्ष ५६ लाखभन्दा बढी कारोबारहरू दर्ता भएको फोनपेले जनाएको छ । यसमध्ये भारतीय पर्यटकबाट हुने कारोबार धेरै छ । ४८ हजारभन्दा बढी ग्राहकले औसतमा तीन पटक कारोबार गरेका छन् । ४२ प्रतिशत कारोबारहरू रु १,००० देखि ५,००० को दायरामा परेका छन् । यसअन्तर्गत मुख्यगरी खाना, किनमेल र यात्रा खर्च समेटिएको छ ।
यसैगरी नेपालका व्यवसायीहरूले पनि यूपीआई भुक्तानीलाई सहज रूपमा अपनाएको फोनपेले उल्लेख गरेको छ । खुद्रा पसल (२७ प्रतिशत), रेस्टुरेन्ट तथा क्याफे (१९.६८ प्रतिशत) र होटल तथा रिसोर्ट (१५.४ प्रतिशत) प्रमुख खर्च क्षेत्र रहेका छन् । पशुपतिनाथ मन्दिर, ठमेल, पोखरा (लेकसाइड), मुक्तिनाथ र सीमाक्षेत्रका अस्पतालहरू यूपीआई कारोबारका प्रमुख केन्द्रहरू बनेको कम्पनीको भनाइ छ ।
कम्पनीका अनुसार यूपीआई भुक्तानी सुविधा सहरहरूमा मात्र नभई डोल्पा, अछाम र बाजुरा जस्ता दुर्गम स्थानहरूमा पनि विस्तार भइसकेको छ ।
पछिल्लो अध्यावधिक: चैत ६, २०८१ १२:३५
