नेपालमा हाइड्रोजन कारको नेतृत्व गर्ने डा. थापालाई प्रधानमन्त्री राष्ट्रिय प्रतिभा पुरस्कार

काठमाडौं । नेपालमा हाइड्रोजन कार र हरित ऊर्जा प्रवर्द्धनमा क्रियाशील डा. विराज सिंह थापा लाई सरकारले प्रधानमन्त्री राष्ट्रिय प्रतिभा पुरस्कार-२०८१ बाट सम्मान गरेको छ ।

हरित हाइड्रोजन इन्धन उत्पादन र प्रयोगको सफल अनुसन्धानका लागि उनलाई विज्ञान, प्रविधि, तथा नवप्रवर्तनको क्षेत्रमा पुर्‍याएको योगदानको कदर गर्दै यो सम्मान प्रदान गरिएको हो ।

राष्ट्रिय प्रजातन्त्र दिवस-२०८१ को अवसरमा उत्कृष्ट वैज्ञानिक अनुसन्धान, नवप्रवर्तन, शान्ति, सुशासन, तथा विकासमा योगदान दिने व्यक्तित्वहरूलाई सम्मान गर्ने सरकारले घोषणा गरेअनुसार डा. थापा पुरस्कृत भएका हुन् ।

प्रधानमन्त्री केपी शर्मा ओली र प्रथम महिला राधिका शाक्यले संयुक्त रूपमा उनलाई सम्मानपत्रसहित पाँच लाख रुपैयाँ नगद पुरस्कार प्रदान गरे ।

काठमाडौं विश्वविद्यालयको मेकानिकल इन्जिनियरिङ विभागमा एसोसिएट प्रोफेसर समेत रहेका डा. थापा हरित ऊर्जा विज्ञ हुन् । उनले ग्रीन हाइड्रोजन ल्याबको नेतृत्व गर्दै नेपालमा पहिलो पटक हरित हाइड्रोजन उत्पादन गरेका थिए, जसले खेर जाने बिजुलीलाई नवीकरणीय ऊर्जाका रूपमा उपयोग गर्न सकिन्छ भन्ने सम्भावना प्रमाणित गर्‍यो ।

उनकै पहलमा नेपालमा पहिलो पटक दक्षिण कोरियाबाट हाइड्रोजन कार भित्र्याइएको थियो । साथै, नेपालका ऊर्जा स्रोतहरूको अधिकतम उपयोग गर्न हरित हाइड्रोजनसँग सम्बन्धित नीति निर्माणमा समेत उनको महत्त्वपूर्ण भूमिका रहेको छ ।

नर्वेको नर्वेजियन युनिभर्सिटी अफ साइन्स एण्ड टेक्नोलोजीबाट विद्यावारिधि गरेका डा. थापा नेपाल सरकारको ग्रीन हाइड्रोजन नीतिसँग सम्बन्धित समन्वय समितिका सदस्य हुन् । उनी विश्व ऊर्जा परिषदको स्ट्यान्डिङ कमिटी अन स्टडीजका सदस्यसमेत रहेका छन् ।

पछिल्लो अध्यावधिक: चैत ९, २०८१ २३:९

टिप्पणीहरू