मोबाइलबाट यसरी सजिलै बनाउहोस् नयाँ वर्षको शुभकामना कार्ड

काठमाडौँ । नव वर्षको शुभकामना आदानप्रदान गर्न ई-कार्डले महत्त्वपूर्ण भूमिका खेलेको हुन्छ । विभिन्न व्यक्तिले सामाजिक सञ्जालमा पोस्ट गरेका वा इनबक्समा पठाएका ई-कार्ड देख्दा तपाईंलाई पनि त्यस्तै कार्ड बनाउने रहर लागेको हाेला ।

आज हामी मोबाइल फोनबाटै कसरी स्तरीय ई-कार्ड बनाउन सकिन्छ भन्ने विषयमा जानकारी दिँदैछौँ । यसो त इन्टरनेटमा त्यस्ता थुप्रै एप छ जसको सहायताले हामी स्तरीय ई-कार्ड बनाउन सक्छौँ ।

यहाँ हामी सजिलै र आफूले चाहे अनुसारको ई-कार्ड बनाउन सघाउने उपयुक्त दुई ओटा एपको बारेमा चर्चा गर्दैछौँ । नेपाली फन्ट (अक्षरको बनावट) राखेर ई-कार्ड बनाउन सकिने दुई एपबारे यहाँ जानकारी दिइएको छ ।

क्यान्भा (Canva)

क्यान्भा यस्तो प्लेटफर्म हो, जसको सहायताले हामी आकर्षक टेम्प्लेट प्रयोग गरेर नयाँ वर्षको ई-कार्ड बनाउन सक्छौँ । साथै यस प्लेटफर्ममा आफ्नै शैलीले पनि ई-कार्ड बनाउने सुविधा छ ।

यो एप निःशुल्क छ । तर, केही विशेष टेम्प्लेट तथा फन्ट प्रयोग गर्नका लागि भने शुल्क तिर्नुपर्ने हुन्छ । एन्ड्रोइड प्रयोगकर्ताले यहाँ र आईओएस प्रयोगकर्ताले यहाँ क्लिक गरेर एप डाउनलोड गर्नुहोस् ।

एप डाउनलोड गरिसकेपछि तलको प्रक्रिया अपनाएर ई-कार्ड तयार पार्नुहोस् ।

-   सबैभन्दा पहिले  एप खोल्नुहोस् ।

-   त्यसपछि माथि सर्च बारमा गएर 'New Year Cards' सर्च गर्नुहोस् ।

-   त्यसपछि आफूलाई उपयुक्त हुने कुनै एउटा टेम्प्लेट छान्नुहोस् ।

-   उक्त टेम्प्लेटमा देखाएको जस्तै ई-कार्ड बनाउन सक्नुहुन्छ ।

क्यान्भामा आफूले चाहेको जस्तै डिजाइन त गर्न सकिन्छ । तर, टेम्प्लेटमा तपाईँले खोजेको जस्तै डिजाइन नहुन सक्छ । त्यसैले तपाईँले आफैले खोजेको जस्तो डिजाइन बनाउन उक्त एपका टुलबारे जानेको हुनुपर्छ ।

पिक्सेल ल्याब (Pixellab)

पिक्सेल ल्याब त्यस्तो एप हो, जसको सहायताले स्तरीय पोस्टर तथा ई-कार्ड बनाउन सकिन्छ । यसलाई फोटोशपकै रूपमा पनि प्रयोग गर्न सकिन्छ । एप इन्सटल गर्नेदेखि कार्ड डिजाइन गर्ने तरिकाबारे यहाँ जानकारी दिइएको छ:

१. एप र एपमा फन्ट इन्स्टल

सबैभन्दा पहिले तपाईंले एन्ड्रोइडका लागि यस लिंकमा र आईओएसका लागि यस लिङ्कमा गएर पिक्सेल ल्याब एप इन्स्टल गर्नुहोस् ।

यदि तपाईंले बनाउन लागेको पाेस्टरमा अङ्ग्रेजी अक्षर प्रयोग हुन्छन् भने त केही गर्न परेन, एपमा डिफल्ट रूपमा रहेका फन्ट प्रयोग गर्न सक्छौँ ।

तर, पोष्टरमा नेपाली अक्षर प्रयोग गर्नु परे तपाईंले तल उल्लेख गरिएको प्रक्रियाबाट फन्ट इन्स्टल गर्न सक्नुहुन्छ:

यस्ता पोस्टरलाई आकर्षक बनाउन हामीले विभिन्न आकर्षक फन्टहरू प्रयोग गर्नुपर्ने हुन्छ । 

गुगलमा गएर नेपाली फन्ट कलेक्सन जिप फाइल (Nepali Font Collection Zip File) सर्च गरेर फन्ट डाउनलोड गर्नुहोस् ।

फन्ट डाउनलोड गरिसकेपछि त्यसलाई आफ्नो स्मार्टफोनमा रहेको फाइल म्यानेजरमा एक्स्ट्रयाक्ट गर्नुपर्ने हुन्छ । एक्स्ट्रयाक्याट गर्न तपाईंले आफूले डाउनलोड गरेको फन्टको जिप फाइल कुन फोल्डरमा छ भन्ने पत्ता लगाउनुपर्ने हुन्छ ।

प्रायः फोनमा डाउनलोड गरेका सामग्री डाउनलोड फोल्डरमा हुने भएकाले तपाईं त्यहीँ जान सक्नुहुन्छ । आफूले डाउनलोड गरेको जिप फाइलमा ट्याप गर्नुभयो भने एक्स्ट्रयाक्ट गर्ने अप्सन देखाउँछ ।

यसरी फन्ट कुनै फोल्डरमा एक्स्ट्रयाक्ट गर्न सकिन्छ । यो प्रक्रियापछि पिक्सेल ल्याबमा सो फन्ट इन्स्टल गर्नुपर्ने हुन्छ ।

-पिक्सेल ल्याबमा फन्ट इन्स्टल गर्न सबैभन्दा पहिले एप खोल्नुहोस् ।

-एप खोलिसकेपछि त्यहाँ न्यु टेक्स्ट (New Text) लेखिएको एक अप्सन देखिन्छ । तपाईंले त्यसमा ट्याप गर्नुहोला ।

-त्यसपछि तलको ए (A) को आइकनमा ट्याप गर्नुहोस् । त्यसपछि त्यसको माथि थुप्रै अप्सनहरू देखिन्छ । 

-त्यसलाई बायाँतर्फ सार्दै जानुभयो भने फन्ट भन्ने अप्सन देखिन्छ‌ ।

-फन्टमा ट्याप गर्नुभयो भने एउटा नयाँ सेक्सन देखिन्छ, जसमा तपाईंले अन्य तीन अप्सन देख्न सक्नुहुन्छ ।

-‌तपाईंले बीचको माई फन्ट (My Font) मा ट्याप गर्नुभयो भने त्यहाँ खाली सेक्सन देखिन्छ । अब हामीले डाउनलोड गरेको फन्ट यही सेक्सनमा इन्स्टल गर्नुपर्ने हुन्छ । 

-त्यसको तल सर्च बक्स देखिन्छ । सर्च बक्सको छेउमा दुई ओटा आइकन देख्न सकिन्छ । त्यसमध्ये तपाईंले अन्तिमको अप्सन छान्नुपर्ने हुन्छ । 

-यसपछि फाइल म्यानेजरको अप्सन देखिन्छ । त्यहाँ तपाईंले पहिले फन्ट एक्स्ट्रयाक्ट गरेको फोल्डरमा गई फन्ट सेलेक्ट गर्नुहोला । यसरी फन्ट पिक्सेल ल्याबमा इन्स्टल गरिसकेपछि पहिलेको माई फन्टको ठाउँमा तपाईंले थुप्रै फन्टहरू देख्न सक्नुहुन्छ ‌। 

२. डिजाइन गर्ने तरिका

फन्ट इन्स्टलको प्रक्रिया सकिएपछि अब पोस्टर डिजाइनको प्रक्रियामा जाऔँ । यसमा डिजाइन गर्दा धेरै कुरामा ध्यान दिनुपर्ने हुन्छ ।

सबैभन्दा पहिले‌ तपाईंले बनाउन लागेको कार्डको आउटलाइन तयार पार्नुहोस् । भन्नुको अर्थ कार्डमा फन्ट कता राख्ने, ब्याकग्राउन्ड कलर कस्तो राख्ने जस्ता विषय ख्याल गर्नुपर्छ ।    

-सबैभन्दा पहिले ब्याकग्राउन्ड कलर छान्नुहोस्, त्यसका लागि सो पेजको अन्तिमका अप्सन देख्नु हुनेछ । त्यसमध्ये अन्तिमको अघिल्लो अप्सन छान्नुहोला । सो अप्सन छानिसकेपछि कलर भन्ने अप्सन देखिन्छ, त्यसमा ट्याप गरेर आफूलाई आवश्यक कलर छान्न सक्नुहुनेछ ।

-कलर छानिसकेपछि, तलको तेस्रो अप्सनमा जानुहाेस् । त्यसपछि माथि शेप्स (Shapes) भन्ने अप्सन देखिन्छ । त्यसमा ट्याप गर्दा वर्गाकार बक्स देखिन्छ । अब तपाईँले त्यही बक्सलाई आफ्नो आवश्यकता अनुसार साइज र कलर मिलाउन सक्नुहुन्छ ।

-त्यसरी हामीले बनाएको पोस्टर जस्तै विभिन्न कलरका बक्स बनाउनुहोस् ।

– यो प्रक्रिया सकिएपछि तपाईंले अन्य दुई कुरामा ध्यान दिनुपर्छ; एउटा आफ्नो फोटो कता राख्ने भन्ने अनि अर्को फन्ट कता राख्ने ?

-  यदि तपाईँ आफूले राख्न चाहेको फोटोको फोटोको ब्याकग्राउन्ड हटाउन चाहनुहुन्छ भने ब्याकग्राउन्ड रिमुभर साइट प्रयोग गर्न सक्नुहुन्छ, जस्तै रिमुभ डट बिजी ।

यसरी फोटोमा देखाए जस्तो पोस्टर तपाईंले आफ्नो फोनको एपबाट केही समयमा नै बनाउन सक्नुहुन्छ ।

पछिल्लो अध्यावधिक: बैशाख १, २०८० १३:५

टिप्पणीहरू