सामाजिक सुरक्षा भत्तामा राष्ट्रिय परिचयपत्र नम्बर अनिवार्य, भदौसम्म लिए पनि साउनदेखिकै भत्ता

काठमाडौं । सरकारले २८ ओटा जिल्लामा सामाजिक सुरक्षा भत्ताका लागि राष्ट्रिय परिचयपत्र नम्बर अनिवार्य गरेपछि बढेको भिड कम गर्न केही लचिलो नीति लिएको छ । गृह मन्त्रालयले सोमबार एक सूचना प्रकाशित गर्दै भदौ मसान्तसम्म राष्ट्रिय परचिय पत्र नम्बर प्राप्त गरे पनि १ साउन देखिकै सामाजिक सुरक्षा भत्ता उपलब्ध हुने व्यवस्था मिलाएको हो ।

सरकारले पहिलो चरणमा १ साउनदेखि तोकिएका २८ जिल्लामा सामाजिक सुरक्षा भत्ताका लागि राष्ट्रिय परिचयपत्र नम्बर आवश्यक पर्ने निर्णय गरेको छ । जसका कारण जिल्ला प्रशासन कार्यालयहरूमा राष्ट्रिय परिचयपत्रका लागि विवरण दर्ता गराउने सेवाग्राहीहरूको भिड बढेको छ ।

यस्तोमा जेष्ठ नागरिक तथा अशक्त व्यक्तिहरूलाई समेत सेवा लिन असहज भएको प्रति ध्यानाकर्षण जनाउँदै गृहमन्त्रालयले प्रेस विज्ञप्ति नै जारी गरेको हो ।

सामाजिक सुरक्षा भन्ताका लागि राष्ट्रिय परिचयपत्र नम्बर अनिवार्य गरिएका जिल्लामा भाद्र मसान्तसम्म परिचय नम्बर प्राप्त गरी लाभग्राहीको परिचयपत्र नवीकरण गरेमा १ साउनदेखिकै सामाजिक सुरक्षा भत्ता उपलब्ध हुने कानुनी व्यवस्था रहेको छ । बालबालिका, आफ्नो हेरचाह गर्न नसक्ने व्यक्ति, अशक्त, असहाय र ९० वर्ष माथिका जेष्ठ नागरिकहरूलाई भने सामाजिक सुरक्षा भत्ता प्राप्त गर्न राष्ट्रिय परिचय नम्बर आवश्यक पर्दैन ।

सेवाग्राहीहरूलाई सहज रूपमा सेवा उपलब्ध गराउने उद्देश्यले पहिलो चरणमा राष्ट्रिय परिचयपत्र लागु भएका २८ ओटा जिल्लामा ४३८ जना विवरण दर्ता अपरेटर खटाइएको छ । सेवा ग्राहीहरूको चापका आधारमा सम्बन्धित स्थानीय तहसँगको समन्वयमा पायक पर्ने उपयुक्त स्थानमा विवरण दर्ता स्टेसनहरू सञ्चालनको व्यवस्था मिलाउन सक्ने गरी प्रमुख जिल्ला अधिकारीलाई अधिकार समेत प्रदान गरिएको गृह मन्त्रालयले जनाएको छ ।

जिल्ला प्रशासन कार्यालयहरूमा सेवा लिन आउने सेवा ग्राहीहरूलाई अशक्तको हकमा तत्काल र अन्यको हकमा पहिले आउनेलाई पहिला सेवा प्रवाहको आवश्यक व्यवस्था मिलाउन समेत सबै जिल्ला प्रशासन कार्यालयहरूलाई पत्राचार गरिएको छ ।

जेष्ठ नागरिक र अशक्तहरूलाई लक्षित गरी सम्बन्धित स्थानीय तहहरूसँगको समन्वयमा सकभर वडा स्तरमै विवरण सङ्कलनको व्यवस्था मिलाउन समेत सम्बन्धित प्रमुख जिल्ला अधिकारीलाई निर्देशन दिइएको गृहले उल्लेख गरेको छ ।

राष्ट्रिय परिचयपत्र नम्बर अनिवार्य गरिएका जिल्लाहरू

१) झापा 

२)मोरङ

३)सुनसरी

४)उदयपुर

५)सप्तरी

६)सिरहा

७)धनुषा

८)महोत्तरी

९)बारा

१०)पर्सा

११)रौतहट

१२)सर्लाही

१३) रुपन्देही

१४)दाङ

१५)कपिलवस्तु

१६)बाँके

१७)सुर्खेत

१८)बर्दिया

१९)कैलाली

२०)कञ्चनपुर

२१)काठमाडौं

२२)भक्तपुर

२३)ललितपुर 

२४)सिन्धुली 

२५)मकवानपुर

२६)चितवन 

२७)कास्की 

२८)तनहुँ

पछिल्लो अध्यावधिक: असार १०, २०८१ १५:२३

टिप्पणीहरू