ब्लक गरेका प्रयोगकर्ताले समेत पब्लिक पोस्ट देख्न पाउने बनाउँदै एक्स

काठमाडौं । सामाजिक सञ्जाल एक्स (ट्वीटर)ले ब्लक गरिएका अकाउन्टले समेत तपाईंका पब्लिक पोस्ट देख्न सकिने बनाउन थालेको छ । कम्पनीले ब्लक बटन पछाडिको फङ्सनालिटीलाई परिवर्तन गर्दै यस किसिमको व्यवस्था गर्न लागेको हो ।

स्वतन्त्र अनुसन्धानकर्ता निमा ओजीले फेला पारेको यो विषयलाई एलन मस्कले सोमबार पुष्टि समेत गरेका छन् । ब्लक गरिएका अकाउन्टबाट ब्लक गर्ने अकाउन्टसँग इङ्गेज हुन भने पाउने छैनन् । तर उनीहरूले ब्लक गर्ने व्यक्तिका पोस्ट भने देख्न पाउनेछन् ।

"ब्लक फङ्सनले त्यस्तो अकाउन्टलाई इङ्गेजिङ हुनबाट ब्लक गर्नेछ, तर पब्लिक पोस्ट हेर्नबाट भने ब्लक गर्ने छैन," मस्कले सोमबार पोस्ट गर्दै भनेका छन् । ओजीको भनाइमा ब्लक गर्ने अकाउन्ट भिजिट गर्दा ब्लक गरिएका अकाउन्ट प्रयोगकर्ताले "तपाईं ब्लक हुनु भएको छ..." भन्ने कुरा प्रयोगकर्ताले नदेख्न सक्छन् ।

बरु त्यसको साटो ब्लक गरिएका प्रयोगकर्ताले अन्य प्रयोगकर्ताले जस्तै गरी ब्लक गर्ने अकाउन्टका पब्लिक पोस्ट देख्न सक्छन् । यद्यपि रिपोस्ट गर्न, कोट गर्न, रिप्लाई दिन अथवा ब्लक गरिएका अकाउन्टसँग इङ्गेज हुने सवालमा भने सीमितता लागु हुन सक्छ । 

High time this happened.

The block function will block that account from engaging with, but not block seeing, public post.

— Elon Musk (@elonmusk) September 23, 2024

यो परिवर्तन कहिलेदेखि लागु हुन्छ भन्ने विषय भने स्पष्ट भइसकेको छैन । मस्कले सोमबारको ट्वीट पोस्टमा यसका लागि धेरै समय लाग्ने सङ्केत भने गरेका छन् । अहिलेको समयमा यदि कुनै पब्लिक अकाउन्टबाट कुनै प्रयोगकर्तालाई ब्लक गरिएको छ भने त्यस्तो प्रयोगकर्ताले लगआउट गरेर ब्लक गर्ने व्यक्तिका ट्विट हेर्न सक्छन् । अब भने एक्सले यो झन्झटलाई दूर गर्न लागेको हो ।

मोटामोटी रूपमा १० वर्ष अघि, जब ट्वीटरले ब्लक फिचरमा यस्तै खाले परिवर्तन गरेको थियो । सन् २०१३ मा ट्वीटरले आफ्नो नीति अपडेट गर्दै ब्लक गरिएका प्रयोगकर्तालाई कन्टेन्ट हेर्ने, फलो गर्ने र यतिसम्म कि ब्लक गर्ने व्यक्तिसँग इङ्गेज हुनेसम्मको अनुमति दिएको थियो ।

ब्लक गर्ने अकाउन्टले भने त्यस किसिमको इङ्गेजमेन्ट देख्दैन थिए । सो समयमा ब्लकिङ सम्बन्धीको अपडेटमा झड्का लागेपछि ट्वीटरले एउटा इमर्जेन्सी मिटिङ आह्वान गरेर ब्लकलाई पुनः बलियो बनाउने गरी पुरानै नीतिमा फर्किएको थियो । एक्सको अबको अपडेट भने त्यो स्तरसम्म जाने छैन ।

ब्लकभित्र इङ्गेजमेन्ट हुने अनुमति रहने छैन । मस्कका अनुसार यस किसिमको परिवर्तनले केही व्यक्तिहरू उत्साहित नहुन सक्छन् । सामाजिक सञ्जाल प्रयोगकर्ताले प्रायः दुर्व्यवहार गर्ने, उत्पीडक वा आक्रमणकारीबाट आफूलाई टाढा राख्न ब्लक फिचर प्रयोग गर्ने गर्छन् । ब्लकिङको यो नयाँ परिवर्तनले त्यस किसिमको रोकटोक लगाउने कार्यलाई केही नरम भने अवश्य बनाउनेछ ।

पछिल्लो अध्यावधिक: असोज ८, २०८१ १८:२५

टिप्पणीहरू