नागरिक एपको लाइसेन्सबाट कसरी काटिन्छ चिट ? ‘ई-चलान’ बारे बुझ्नै पर्ने कुरा

काठमाडौं । बागमती प्रदेशमा अब भौतिक सवारी चालक अनुमती पत्र (लाइसेन्स) बोकेर हिँड्नुपर्ने बाध्यता हटेको छ । नागरिक एपमा लिङ्क गरिएको लाइसेन्सबाटै चलान दिन सकिने व्यवस्था लागु भएसँगै भौतिक लाइसेन्स बोकेर हिँड्नु पर्ने बाध्यता हटेको हो । 

प्रविधिमा आधारित यो नवीनतम सेवा कसरी प्रयोग गर्ने र के-कस्ता कुरामा ध्यान दिनुपर्छ त ? आज हामी यसैबारे चर्चा गर्दैछौं: 

सर्वप्रथम त सवारीचालकले बुझ्नुपर्ने कुरा के छ भने यो सेवा हाल बागमती प्रदेशमा मात्र लागु भएको छ । अन्य प्रदेशमा पनि चाँडै यो सेवा सञ्चालनमा आउने काठमाडौं उपत्यका ट्राफिक प्रहरी कार्यालयले जनाएको छ । 

यो सेवा लागू भएसँगै ट्राफिक चेकिङको समयमा सवारी चालकले आफ्नो नागरिक एपमा लिङ्क भएको क्यूआर कोड सहितको लाइसेन्स देखाउन सक्छन् । चेकिङको क्रममा कुनै ट्राफिक नियम उल्लघन भई जरिवाना तिर्नु पर्ने अवस्था सिर्जना भएमा चालकले अनलाइन मार्फत नै चलान (चिट) प्राप्त गर्न सक्छन् । यसरी प्राप्त भएको चलानमा तोकिएको जरिवाना डिजिटल पेमेन्ट सिस्टम मार्फत तिर्न सकिन्छ ।

चालकले जरिवाना तिरेको वा नतिरेको भन्ने विवरण प्रहरीको ट्राफिक भोयलेसन रेकर्ड सिस्टममा रहने हुँदा जरिवाना भरपाई नभएसम्म  दोस्रो पटक कुनै कसुरमा ई-चलान प्राप्त गर्न सकिँदैन ।

जरिवाना भरपाई भएको विवरण पनि नागरिक एपमा नै प्राप्त गर्न सकिन्छ भने भरपाई नभएको सूचना नोटिफिकेसनमार्फत प्राप्त भइरहन्छ । त्यस्तै भौतिक कक्षा लिनुपर्ने भए सो कक्षामा सहभागी नभएसम्म कसुर क्लियर भएको नोटिफिकेसन प्राप्त गर्न सकिने छैन ।

पछिल्लो अध्यावधिक: कात्तिक ६, २०८१ १४:५९

टिप्पणीहरू