स्मार्टफोनमा रहेका ५ सेन्सर, जसले हटाइदिन सक्छन् नयाँ ग्याजेट किन्नुपर्ने बाध्यता
माघ २३, २०८२ १२:१
काठमाडौँ । आधुनिक स्मार्टफोन अब केवल कुराकानी गर्ने वा सामाजिक सञ्जाल चलाउने माध्यममा मात्र सीमित छैनन् । यसभित्र रहेका साना र अदृश्य सेन्सरहरूले तपाईँको हजारौँ रुपैयाँ बचाउनुका साथै धेरैजसो बाहिरी ग्याजेटहरूलाई विस्थापित गर्न सक्ने क्षमता राख्छन् ।
त्यसैले नयाँ डिभाइस खरिद गर्नुअघि आफ्नै खल्तीमा रहेको फोनको क्षमतालाई बुझ्न आवश्यक छ । यहाँ तपाईँको फोनलाई स्मार्ट बनाउन प्रयोग हुने सेन्सरहरूले कसरी महँगा ग्याजेटको काम गर्छन् भन्ने बारेमा चर्चा गर्दैछौँ ।
१. स्पिरिट लेभलको सट्टा एक्सेलेरोमिटर र जाइरोस्कोप
धेरैजसो मानिसहरू घरमा फोटो फ्रेम झुन्ड्याउन वा दराज सिधा छ कि छैन भनेर जाँच्न 'स्पिरिट लेभल' (भित्तामा सिधा लेबल नाप्ने उपकरण) किन्ने गर्छन् । तर तपाईँको फोनमा रहेको ३-एक्सिस एक्सेलेरोमिटर र जाइरोस्कोपले यो काम सजिलै गर्न सक्छन् ।
'फिजिक्स टुलबक्स सुइट' जस्ता एपहरू प्रयोग गरेर तपाईँले कुनै पनि सतह कति डिग्रीले ढल्केको छ भन्ने सटीक जानकारी डिजिटल रूपमा प्राप्त गर्न सक्नुहुन्छ ।
२. डेसिबल मिटरको विकल्पमा माइक्रोफोन एरे
आफ्नो वरपरको आवाज कति चर्को छ वा हेडफोनको भोलुमले कानलाई असर गरिरहेको छ कि छैन भनेर जाँच्न अब छुट्टै डेसिबल मिटर किनिरहनु पर्दैन । फोनको माइक्रोफोनले ६५ देखि ९५ डेसिबलको दायरामा करिब ±२ dB को शुद्धताका साथ ध्वनि मापन गर्न सक्छ ।
यसले छिमेकीसँग ध्वनि प्रदूषणको बारेमा बहस गर्न वा बच्चाहरूको अनलाइन क्लासका लागि शान्त ठाउँ खोज्न मद्दत पुर्याउँछ । 'साउन्ड मिटर' जस्ता एपहरू यसका लागि उपयोगी हुन्छन् ।
३. मेटल डिटेक्टरको रूपमा म्याग्नेटोमिटर
तपाईँको फोनमा दिशा पत्ता लगाउन (कम्पासका लागि) म्याग्नेटोमिटर राखिएको हुन्छ । तर यसले धातु पत्ता लगाउने काम पनि गर्छ । भित्तामा ड्रिल गर्नुअघि पछाडि लुकेका फलामका पाइप वा बिजुलीका तारहरू पत्ता लगाउन यो सेन्सर अत्यन्तै उपयोगी हुन्छ ।
साथै, यसको प्रयोगबाट स्टेनलेस स्टिलको गुणस्तर समेत जाँच्न सकिन्छ, किनकि उच्च गुणस्तरको स्टिल प्रायः गैर-चुम्बकीय हुन्छ ।
४. उचाइ र मौसम मापनका लागि ब्यारोमिटर
धेरै एन्ड्रोइड फोनहरूमा वायुमण्डलीय चाप मापन गर्ने ब्यारोमिटर हुन्छ । यसले जीपीएसको शुद्धता बढाउनुका साथै 'अल्टिमिटर' (उचाइ मापन गर्ने यन्त्र) को काम गर्छ ।
ट्रेकिङ गर्नेहरूका लागि यो निकै उपयोगी छ । साथै, माछा मार्ने शौखिनहरूले वायुमण्डलीय चापमा आउने परिवर्तन हेरेर माछाहरूको गतिविधि अनुमान गर्न सक्छन् । 'ब्यारोमिटर प्लस' जस्ता एपहरूले स्थानीय मौसमको वास्तविक जानकारी दिन मद्दत गर्छन् ।
५. लक्स मिटरको सट्टा एम्बियन्ट लाइट सेन्सर
तपाईँको फोनको स्क्रिनको उज्यालो आफैँ कम वा बढी गराउने एम्बियन्ट लाइट सेन्सरलाई 'लक्स मिटर' को रूपमा प्रयोग गर्न सकिन्छ । लाइट मिटर-लक्स मिटर जस्ता एपको सहयोगमा कोठाको कुन कुनामा हाउस प्लान्ट राख्दा उपयुक्त उज्यालो पुग्छ वा तपाईँले किनेको एलईडी बल्बले दाबी गरेअनुसारको उज्यालो दिएको छ कि छैन भनेर जाँच्न यो सेन्सर काम लाग्छ ।
यसले प्रोफेसनल उपकरणको जस्तो ल्याब-क्यालिब्रेटेड स्तरको शुद्धता नदिए पनि तुलनात्मक मापनका लागि यो पर्याप्त छ ।
यद्यपि यी सेन्सरहरू व्यावसायिक उपकरणहरू जत्तिकै सटीक भने हुँदैनन् । उदाहरणका लागि ब्यारोमिटरले ३,५०० मिटरभन्दा माथिको उचाइमा सही नतिजा नदिन सक्छ र म्याग्नेटोमिटरले साना गैर-चुम्बकीय वस्तुहरू ठम्याउन सक्दैन ।
तथापि, दैनिक प्रयोगका लागि यी सेन्सरहरू अत्यन्तै भरपर्दो र सुविधाजनक छन् । अनावश्यक ग्याजेटहरू किनेर घरमा थुपार्नुको सट्टा आफ्नै फोनमा भएका यी सुविधाहरूको प्रयोग गर्नु बुद्धिमानी हुने विज्ञहरूको सुझाव छ ।
'फिजिक्स टुलबक्स सुइट' र 'फाइफक्स' जस्ता निःशुल्क एपहरूले तपाईँको फोनलाई एउटा बहुउपयोगी टुलमा परिणत गरिदिन सक्छन् ।
पछिल्लो अध्यावधिक: माघ २३, २०८२ १२:१
