close

निःशुल्क यहाँ हेर्नुहोस् हलिउड फिल्म बनाउने नेपाली स्टुडियोले तयार पारेको सिरिजः गोर्खा भर्सेस निञ्जा

टेकपाना टेकपाना

मंसिर २२, २०७९

निःशुल्क यहाँ हेर्नुहोस् हलिउड फिल्म बनाउने नेपाली स्टुडियोले तयार पारेको सिरिजः गोर्खा भर्सेस निञ्जा

काठमाडौं । हलिउड फिल्मको काम गर्ने नेपाली स्टुडियो इन्सेसेन्ट रेन स्टुडियोले ‘गोर्खा भर्सेज निञ्जा’ नामक सिरिज तयार पारेको छ । महिनामा एक पटक आउने यो एनिमेटेड सिरिजका तीन भाग युट्युबमा उपलब्ध भइसकेका छन् । 

‘गोर्खा भर्सेस निञ्जा’ नामक छुट्टै युट्युब च्यानलमा यो सिरिजमा ‘गोर्खा’को बहादुरी देख्न सकिन्छ । नेपाली कलाकारहरूले दिवंगत बेलायती महारानी एलिजाबेथ द्वितीयाको मीठो सम्झनामा पहिलो एपिसोड तयार पारेका छन् । 

सन् १८१६ मा नेपाल र बेलायतबीच सुगौली सन्धिमा हस्ताक्षर भएपछि गोर्खा सैनिकहरू उत्कृष्ठ र साहसी मानिन थाले । त्यससँगै बेलायती राजपरिवारको सुरक्षा गार्डको रूपमा समेत खटिन थाले । यही सन्दर्भलाई ‘गोर्खा भर्सेस निञ्जा’ सिरिजको विषयवस्तु बनाइएको छ ।

 

 

 

पहिलो एपिसोडमा बेलायती महारानीको सुरक्षामा खटिएका गोर्खाली सुरक्षा गार्डको बहादुरी चित्रित गरिएको छ । पहिलो एपिसोडमा डकैतहरूले महारानीको मुकुट चोरी गर्ने प्रयास गर्छन् ।

यस्तोमा गोर्खाली सुरक्षा गार्ड एक्लै दर्जनौँ डाँकाहरूबाट बहादुरीपूर्वक महारानीको सुरक्षा गर्न सफल हुन्छन् । यति ठूलो आक्रमणको प्रतिरक्षा गर्दा समेत दरबारमा भएका कसैलाई त्यसको छनकसम्म मिल्दैन ।

 

 

 

ज्याक स्टेञ्जको लेखन रहेको यो सिरिजको निर्देशन इन्सेसेन्ट रेन स्टुडियोका संस्थापक तथा सह प्रमुख कार्यकारी अधिकृत (कोसीईओ) किरणभक्त जोशीले गरेका छन् । सिरिजको दोस्रो भागमा क्यान फिल्म फेस्टिभलका क्रममा गोर्खा, निञ्जा, एक पप स्टार गायिका र कुकुर अपहरणकारीको भूमिका देख्न सकिन्छ । 

 

फेस्टिभलमा प्रस्तुति दिन जाने क्रममा गायिकाको कुकुर अपहरणकारीबाट चोरी चोरी हुन्छ । त्यसको चाल गोर्खाले पाउँछ । तर ती अपहरणकारीको समूह कुकुर लिएर भाग्छ र गोर्खा कुकुर खोसेर ल्याउन उनीहरूको पछाडि कुद्छन् । 

 

 

 

केही बेरको भागमभागपछि गोर्खा कुकुर फर्काएर ल्याउँछन् । यो सबै घटनाक्रम यति छिटो पूरा हुन्छ कि, ती पप स्टार गायिकाले त्यसको चाल समेत पाउँदिनन् । सिरिजको तेस्रो भागमा फुटबल विश्वकपको सन्दर्भ छ ।

सुरुका दुई एपिसोडमा पात्रहरूबीच मौखिक सम्वाद नभए पनि यो पछिल्लो एपिसोडमा भने तपाईँले गोर्खा र उनकी छोरीबीच भएको (अङ्ग्रेजी भाषामा) सम्वाद सुन्न सक्नु हुनेछ । यो सिरिज नियमित रूपमा युट्युबमा पब्लिस हुने जोशीको भनाइ छ ।