कर्णालीको दुर्गम भेगमा इन्टरनेट पुर्याएको वर्ल्डलिङ्कलाई क्याम्बियम अवार्ड
साउन २९, २०७७ २२:१८
काठमाडौं । मुलुकको सबैभन्दा ठूलो इन्टरनेट सेवाप्रदायक कम्पनी वर्ल्डलिंक कम्युनिकेसन लिमिटेडले क्याम्बियम हिरो अवार्ड हात पारेको छ । कर्णालीको दुर्गम भेगमा वायरलेस प्रविधिमार्फत ब्रोडब्याण्ड सेवा पुर्याए वापत कम्पनीले यो अवार्ड प्राप्त गरेको हो ।
नियामक नेपाल दूरसञ्चार प्राधिकरण अन्तर्गत रहेको ग्रामीण दूरसञ्चार विकास कोष अन्तर्गतको परियोजनामार्फत वर्ल्डलिङ्कले त्यस क्षेत्रमा इन्टरनेट सेवा उपलब्ध गराउँदै आएको छ । खास गरी डोल्पाको धो तराब, हुम्लाको लिमी जस्ता हाई अल्टिच्युड भएका ४६०० मिटरभन्दा उच्च स्थानमा वायरलेस प्रविधिमार्फत इन्टरनेट सेवा विस्तार गरेका कारण कम्पनीलाई यो अवार्ड प्रदान गरिएको हो ।
क्याम्बियम नेटवर्कले प्रदान गर्ने यो अवार्ड वायरलेस प्रविधिमार्फत दुर्गम तथा ग्रामीण क्षेत्रका जनताको जीवनस्तरमा सहजता ल्याएर डिजिटल डिभाइड अर्थात डिजिटल विभेद कम गरे वापत प्रदान गरिँदै आएको छ । वर्ल्डलिङ्कसँगै अमेरिकाको एम्प्लेक्स इन्टरनेट, स्पेनको आईबरसिस्टम तथा पीबी सेगुरिड्याड र कोलम्बियाको स्काइनेटले समेत यो अवार्ड हात पारेका छन् ।
वर्ल्डलिंक कम्युनिकेसन कर्णाली परियोजना प्रोजेक्ट म्यानेजर राजेन्द्र विष्टले हाल कम्पनीले कर्णाली क्षेत्रमा १० हजारभन्दा धेरै ग्राहकलाई इन्टरनेट सेवा प्रदान गर्दै आएको जानकारी दिए ।
सुर्खेत, सल्यान र जुम्लामा भने कम्पनीले आफ्नै निजी प्रयासबाट एफटीटीएच प्रविधि नै पुर्याएको छ । तर त्यसमाथिका क्षेत्रमा भने ५.२ र ५.७ गिगाहर्ज ब्याण्डको फ्रिक्वेन्सी प्रयोग गरी वायरलेस प्रविधिमार्फत इन्टरनेट उपलब्ध गराउँदै आएको विष्टको भनाई छ ।
‘निकै दुर्गम क्षेत्र भएको र यातायातको सुविधा समेत नभएकाले सेनाको हेलिकोप्टरबाट गएर आवश्यक संरचना सेटअप गरी सेवा दिँदै आएका छौं,’ उनले भने, ‘तर यो क्षेत्रमा विद्युत सेवा नपुगेकाले सोलार सिस्टमबाटै इन्टरनेट सेवा सञ्चालन गर्नुपर्ने बाध्यता छ ।’
यस्तोमा वर्षात् याममा मुस्किलसँग घाम लाग्छ । हिउँदमा हिँउँले छपक्कै छोपिदिन्छ । जसले गर्दा सोलार सिस्टमले काम गर्न नसकेको अवस्थामा सेवालाई निरन्तरता दिन निकै चुनतीपूर्ण अवस्था छ । कुनै अरु खालको समस्या देखिए कुनै ठाउँमा पुगेर मर्मत सम्भार गर्न पाँच सात दिन नै लाग्ने गरेको परियोजना प्रमुख विष्ट सुनाउँछन् ।
‘हामी आर्मीकै हेलिकोप्टरबाट गएर भए पनि हिउँ हटाएर सेवा सुचारु राख्ने कोसिस गर्दै आएका छौं,’ विष्टले भने, ‘यो क्षेत्रमा हाम्रा लागि सबैभन्दा चुनौतीको विषय नै यातायात हुने गरेको छ ।’
कर्णाली जस्तो दुर्गम स्थानमा समेत कम्पनीले दुई एमबीपीएस गतिको ब्रोडब्याण्ड इन्टरनेट सेवा दिँदै आएको छ । परियोजनाका लागि मात्रै वर्ल्डलिंकको ४५ जनाको टिम डेडिकेटेड रुपमा सक्रिय रहेको विष्टले सुनाए ।
पछिल्लो अध्यावधिक: असोज २, २०७९ २२:३०
