ज्याक मा बेपत्ता भएको विषयमा बोल्दा खगेन्द्र संग्रौलाको ट्वीट गायब !
पुस २१, २०७७ १८:५०
काठमाडौं । समसामयिक तथा सार्वजनिक विषयका प्रखर वक्ता खगेन्द्र संग्रौलाले आफ्नो ट्वीट गायब बनाइएको दाबी गरेका छन् ।
चिनियाँ टेक जायन्ट कम्पनी अलिबाबाका संस्थापक तथा धनाढ्य ज्याक मा सार्वजनिक वृतबाट ओझेल भएपछि उनको कथित वेपत्ताको विषयमाथि टिप्पणी गरेको आफ्नो ट्वीट गायब बनाइएको गुनासो संग्रौलाको छ ।
संग्रौलाले आफ्नो आधिकारिक ट्वीटर ह्यान्डलबाट आफ्नो अघिल्लो ट्वीट वेपत्ता भएको जिकिर गर्दै यस्तो ट्वीट लेखेका छन् :
‘‘उल्का भाे!
चीनका महाधनाढ्य ज्याक मा बेपत्ता भएकाे प्रसङ्गमा चीनमा नागरिककाे सुरक्षा र अस्मिताकाे हालतबारे हिजाे बेलुका ट्वीट गर्याथेँ, मेराे वालबाट त्याे ट्वीट गायब भएछ। याे गायब पार्ने चिनियाँ “समाजवाद” हाे कि, सी विचारधाराका नेपाली अनुयायी हुन् कि कुनै चटके चाेर हाे ? थाहा चाहियाे !’’
ज्याक मा विगत दुई महिनादेखि गुमनाम भएपछि अहिले ट्वीटर लगायत सामाजिक सञ्जालमा यस विषयलाई लिएर टिप्पणीहरु उठ्न थालेका छन् ।
स्पष्ट वक्ताको छवि बनाएका ज्याक माले गत अक्टोबर २४ मा चिनियाँ सरकारको वित्तीय प्रणालीका बारेमा खरो टिप्पणी गरेका थिए ।
त्यसको केही दिनमा चिनियाँ सरकारले उनको आन्ट ग्रुपको शेयर निश्काषनलाई एकाएक रोकिदिएको थियो । उक्त आईपीओलाई विश्वको एउटा ठूलो आकारको आईपीओको रुपमा हेरिएको थियो ।
ज्याक माको सोही सार्वजनिक अभिव्यक्तिपछि चिनियाँ नियामकले उनको फिनटेक तथा आन्ट ग्रुपमाथि एकपछि अर्को गर्दै श्रृंखलावद्ध रुपमा अनुसन्धान र जाँचको थालनी गरेको छ ।
आन्ट ग्रुपलाई अवैधानिक एकाधिकार प्रवृतिको अभ्यास गरेको भन्दै प्रशासनले त्यसलाई परिमार्जन गर्न समेत उनलाई अल्टिमेटम दिएको थियो ।
लाइमलाइटमा रहन रुचाउने ज्याक मा एकाएक ओझेलमा परेपछि यसले विश्वलाई आश्चर्यमात्र बनाएको छैन, चीनको सर्वसत्तावादी र निरङ्कुश छविमाथि समेत आशंका गर्ने अर्को कारण थपिएको छ । यसै विषयलाई लिएर ट्वीटरमा अहिले बहस पनि चल्न थालेको छ ।
ज्याक मा आफैले तयार गरेको अफ्रिकन टिभी प्रोग्रामको अन्तिम एपिसोडमा समेत उपस्थित भएनन् ।
यद्यपि आफ्नो प्रतिकूल समयमा निस्क्रिय बस्ने कुरा चिनियाँ उद्योगी तथा व्यक्तित्वहरुका लागि नयाँ कुरा भने होइन । यसअघि जेडडी डटकमका संस्थापक रिचार्ड ल्युले बलात्कारको आरोपपछि गत वर्ष चीनको महत्वपूर्ण राजनीतिक समारोहमा उपस्थिति जनाएका थिएनन् ।
यस्तै टेन्सेन्टका संस्थापक पोनी माले पनि एक वर्षसम्म सार्वजनिक रुपमा ओझेल भएर आफ्नो प्रोफाइललाई लो राखेका थिए ।
पछिल्लो अध्यावधिक: असोज २, २०७९ २२:३१
