काठमाडौं । झन्डै आठ महिनादेखि रोकिएको सवारी चालक अनुमति पत्र (ड्राइभिङ लाइसेन्स) छपाइको काम माघ महिनादेखि पुनः सुरु हुने भएको छ । ड्राइभिङ लाइसेन्स छपाइका लागि चाहिने कार्ड आज (बिहीवार) नेपाल आउने भएसँगै पुनः लाइसेन्स छपाइको काम सुरु हुने भएको हो ।
यातायात व्यवस्था विभागका महानिर्देशक उद्धवप्रसाद रिजालले कार्ड कतार एयरलाइन्सको विमानमार्फत आज नेपाल पुग्ने बताए । उनका अनुसार छपाइका लागि आवश्यक पर्ने कार्ड दुई वर्षदेखि नेपाल आउन छोडेको थियो भने आठ महिनादेखि छपाइको काम ठप्प थियो ।
“आज छ लाख कार्ड नेपाल आउँदैछ,” महानिर्देशक रिजालले टेकपानासँग भने, “हामी माग महिनाको पहिलो सातादेखि पुनः लाइसेन्स प्रिन्टको काम अगाडि बढाउँछौं ।”
कार्ड छाप्न सरकार र जर्मनी कम्पनी मुहेल्बर आईडी सेवा जीएमबीएचसँग गत फागुनमा सम्झौता भएको थियो । सम्झौता अनुसार उक्त कम्पनीले पहिलो चरणमा छ लाख कार्ड र अर्को चरणमा बाँकी छ लाख कार्ड नेपाल पठाउने छ ।
कार्ड नेपाल आइपुगेसँगै कार्ड छाप्ने मसिनको अवस्था हेरेर दैनिक सातदेखि १० हजार कार्ड छाप्ने तयारी गरिरहेको महानिर्देशक रिजालले सुनाए ।