१० हजार बढीले हेरे विद्यार्थीले बनाएका एआई र रोबोट सम्बन्धी प्रविधि

काठमाडौँ । सफ्टवेरिका कलेज अफ आईटी एन्ड ईकमर्सले आयोजना गरेको आर्टिफिसियल इन्टेलिजेन्स (एआई), रोबोट र साइबर सुरक्षासम्बन्धी परियोजनाहरूको प्रदर्शनी ‘टेक एक्स २०२४’मा १० हजारभन्दा बढीले अवलोकन गरेका छन् । यही साउन १५ गतेदेखि २० गतेसम्म डिल्लीबजारस्थित कलेज परिसरमा आयोजित प्रदर्शनीमा सूचना प्रविधिमा रुचि राख्ने विद्यार्थी, अध्येता, राजनीतिकर्मी तथा सरोकारवालाहरूको उल्लेख्य सहभागिता रहेको कलेजले जनाएको छ ।

कलेजमा स्नातक तह दोस्रो र तेस्रो वर्षमा अध्ययनरत विद्यार्थीले निर्माण गरेका परियोजनाहरू प्रदर्शनीमा राखिएको थियो ।

प्रदर्शनीमा नेपाली कांग्रेसका महामन्त्री तथा सांसद गगनकुमार थापा, राष्ट्रिय स्वतन्त्र पार्टीका सांसद हरि ढकाललगायतका विभिन्न पार्टीका राजनीतिज्ञ तथा नेपाल प्रहरीका पूर्वप्रहरी नायब महानिरीक्षक रमेश खरेललगायतले अवलोकन गरेका थिए ।

साथै, प्लस टु तह पूरा गरेका तथा अध्ययनरत विद्यार्थीका साथै सूचना प्रविधि उद्यमीहरूको पनि उल्लेख्य सहभागिता रहेको कलेजले जनाएको छ ।

“प्रदर्शनी सूचना प्रविधिमा रुचि राख्ने, अध्ययन गर्न चाहने लगायतलाई लक्षित गरी सुरु गरिएको थियो, प्रदर्शनी सफलतापूर्वक सम्पन्न भएको छ,” कलेजका निर्देशक अमृत थापाले भने, “प्रदर्शनीमा अवलोकनकर्ताको भिडले हामीलाई हौसला मिलेको छ, प्रदर्शनी प्रविधिमा रुचि राख्नेहरूसँगै राजनीतिकर्मीहरूको सहभागिताले विशेष बनेको छ ।”

प्रदर्शनीमा सञ्चालित रोबो मेनियामा एक्सर पहिलो भयो भने दोस्रो स्थान डिस्ट्रक्टरले पायो । साथै, तेस्रो स्थानमा बोटमाइन्ड्स रह्यो । पहिलो, दोस्रो र तेस्रो हुनेले क्रमशः ४० हजार, २० हजार र १० हजार रुपैयाँ प्राप्त गरे ।

प्रदर्शनीमा रोबोटिक डग, लाइब्रेरी तथा एयरपोर्ट म्यानेजमेन्टका लागि लक्षित गरी निर्माण गरिएका असिस्टेन्ट एआई रोबोट र गोदाम व्यवस्थापनको अर्धस्वचालित प्रविधि, विद्यार्थीहरूले पासवर्ड क्र्याकिङको विश्लेषण गर्ने रोबोट लगायतका परियोजना राखिएको थियो ।

कार्यक्रमको मुख्य उद्देश्य पछिल्लो समय आईटीको क्षेत्रमा भइरहेको आमूल परिवर्तनबारे जानकारी दिनु रहेको कलेजले जनाएको छ । विद्यार्थीहरूले आईटीसम्बन्धी अध्ययनपश्चात् जीवन उपयोगी सीप विकासमा कस्तो भूमिका खेलिरहेका छन् भन्नेबारे पनि कार्यक्रममा चर्चा गरिएको कलेजका अध्यक्ष विज्ञान श्रेष्ठले बताए ।

“आईटीको क्षेत्रमा पछिल्लो समय के–कस्ता परिवर्तन भइरहेका छन् । यही क्षेत्रमा के–के परिवर्तन गर्न सकिन्छ । आईटी अध्ययनले हाम्रो जीवनमा कस्तो भूमिका खेलिरहेको छ । र, हामीलाई आईटी अध्ययन किन जरुरी छ भन्ने जस्ता कुराको ज्ञान दिन कार्यक्रम आयोजना गरिएको थियो,” कलेज प्रमुख प्रमोद पौडेलले भने ।

पछिल्लो अध्यावधिक: साउन २२, २०८१ ९:२२

टिप्पणीहरू