काठमाडौं । वेबसाइट जति छिटो लोड हुन्छ, त्यसले सञ्चालक र प्रयोगकर्तालाई उत्तिकै फाइदा पुर्याउँछ । वेबसाइट छिटो हुँदा सर्च इन्जिन अप्टिमाइजेसन (एसईओ)मा फाइदा पुग्छ । किनकि गुगलजस्ता सर्च इन्जिनहरूले वेबपेजको गतिका आधारमा वेबसाइटलाई र्याङ्किङ गरी सर्च रिजल्टमा देखाउँछन् । यसले सञ्चालकलाई प्रत्यक्ष फाइदा हुन्छ ।
अर्कोतर्फ, प्रयोगकर्ताका लागि पनि वेबसाइट छिटो चल्नाले राम्रो अनुभव प्रदान गर्छ । जसले गर्दा उनीहरू वेबसाइटमा लामो समय बिताउन सक्छन् र पुन: आउने सम्भावना बढ्छ । तर, वेबसाइट ढिलो चल्यो भने ? यसको नतिजा बुझाउनै नपर्ला !
जसरी हामीले इन्टरनेटको गति थाहा पाउन सक्छौं, त्यसरी नै वेबसाइटको गति पनि मापन गर्न सकिन्छ । यसका लागि विभिन्न टुल उपलब्ध छन् । यहाँ हामी केही प्रमुख टुलहरूबारे चर्चा गर्नेछौं ।
तर, त्यसअघि, वेबसाइट स्पीड टेस्ट टुल भनेको के हो भन्ने बुझौं :
सामान्यतः कुनै पनि वेबसाइट कति छिटो लोड हुन्छ भनेर मापन गर्ने विशेष सफ्टवेयर एप्लिकेसनलाई वेबसाइट स्पीड टेस्ट टुल भनिन्छ । यी टुलहरूले सर्भर रेस्पोन्स टाइम, पेज साइज, पेज लोड टाइमजस्ता विभिन्न सूचकहरूका आधारमा वेबसाइटको गति मापन गर्छन् ।
यसले वेबसाइट किन ढिलो लोड भइरहेको छ भन्ने कारणहरू पनि जानकारी दिन्छ, जसले गर्दा वेबसाइट सञ्चालक तथा डेभलपरहरूका लागि यी टुल अत्यन्तै उपयोगी हुन्छन् ।
अब केही प्रमुख टुलहरूको बारेमा जानौं :
पेजस्पीड इनसाइट्स (PageSpeed Insights)
यो टुल गुगलले बनाएको हो र यसमा गुगलको लाइटहाउस प्लेटफर्म प्रयोग गरिएको छ । क्रोम ब्राउजर अथवा गुगल एनालिटिक्स (युजर बिहेभियर > साइट स्पीड) बाट पनि यो टुल चलाउन सकिन्छ ।
यो टुलले वेबसाइटको गति सुधार गर्न आवश्यक पर्ने सबैजसो सूचना प्रदान गर्छ । सरल डिजाइनमा बनेको यो टुल चलाउन सहज र नि:शुल्क छ, तर कहिलेकाहीं एउटै यूआरएल पुन: विश्लेषण गर्दा फरक नतिजा देखिन सक्छ । वेब डेभलपरहरूका लागि केन्द्रित भएकाले यसले दिने नतिजा साधारण प्रयोगकर्ताहरूले बुझ्न गाह्रो पर्न सक्छ ।
टुल चलाउन यहाँ क्लिक गर्नुहोस् ।
जीटी मेट्रिक्स (GTmetrix)
जीटीमेट्रिक्स अर्को उपयोगी टुल हो जसले वेबसाइटको स्पीडबारे विस्तृत जानकारी दिन्छ । वेबसाइटको यूआरएल राखेर विश्लेषण गर्न समय लाग्न सक्छ, तर परिणाम आएपछि यसले विभिन्न सूचकहरू प्रस्तुत गर्छ ।
अकाउन्ट नखोली पूर्व विवरण हेर्न नसकिने र अकाउन्ट नखोलेमा क्यानडियन सर्भर प्रयोग गर्ने यसको केही सीमा हुन सक्छ । तर, अकाउन्ट खोलिसकेपछि तपाईंले विभिन्न देशबाट वेबसाइटको गति परीक्षण गर्न सक्नुहुन्छ ।
टुल चलाउन यहाँ क्लिक गर्नुहोस् ।
पिङडम (Pingdom)
पिङडमले सबै प्रकारका प्रयोगकर्ताहरूलाई वेबसाइटको गति परीक्षण गर्न सहायता पुर्याउँछ । यो टुलले वेबसाइटको आधारभूत जानकारीहरू देखाउँछ र नतिजालाई चार्टमा प्रस्तुत गर्छ ।
यो नि:शुल्क उपलब्ध छ, तर डेभलपरहरूको लागि पर्याप्त नतिजा नदिने हुन सक्छ । सशुल्क भर्सनमा अतिरिक्त सुविधाहरू उपलब्ध छन् ।
टुल चलाउन यहाँ क्लिक गर्नुहोस् ।
वेब पेज टेस्ट (WebPageTest)
वेब पेज टेस्ट एक सामान्य टुल हो, तर यसले विभिन्न विकल्पहरू राखेर वेबसाइटको स्पीड परीक्षण गर्न सकिन्छ । विस्तृत नतिजाहरूका साथ ग्राफिक्समा पनि जानकारी प्रस्तुत गरिने भएकाले साधारण प्रयोगकर्ताले पनि सजिलै बुझ्न सक्छन् ।
टुल चलाउन यहाँ क्लिक गर्नुहोस् ।
अलर्टा (Alerta)
अलर्टा प्राविधिक रूपमा वेबसाइट स्पीड टेस्ट टुलमा पर्दैन, तर यसले वेबसाइटको पिङ टेस्ट गर्छ । पिङ टेस्टले कम्प्युटर र वेबसाइट सर्भरबीचको रेस्पोन्स टाइम मापन गर्छ ।
यसको नि:शुल्क भर्सनबाट वेबसाइट अनलाइन छ कि छैन भन्ने जानकारी प्राप्त गर्न सकिन्छ । विश्वका विभिन्न ठाउँबाट पिङ टेस्ट गर्न सकिने यो टुलले आधारभूत जानकारी प्रदान गर्छ ।
टुल चलाउन यहाँ क्लिक गर्नुहोस् ।
यी सबै टुलहरूले वेबसाइटको गति परीक्षण गर्न मद्दत पुर्याउँछन्, र तपाईंले आफ्नो आवश्यकता अनुसार कुनै पनि टुल प्रयोग गर्न सक्नुहुन्छ ।
