काठमाडौं । यही २० चैतदेखि सडकमा नेपालभरिका शिक्षकहरूको प्रतिनिधित्व गर्दै काठमाडौंमा शिक्षक आन्दोलन भइरहेको छ । विद्यालय शिक्षा ऐनको माग राख्दै उनीहरू आन्दोलनमा उत्रिएका हुन् ।
विगत ६ दिनदेखि आन्दोलनरत शिक्षकहरूले सोमबारदेखि त शैक्षिक गतिविधिलाई नै बन्द गरेर संघर्षमा उत्रिएका छन् । शिक्षक आन्दोलन आवश्यक छ कि छैन भनेर विभिन्न पक्षबाट बहस भइरहँदा आन्दोलनको शैलीले धेरैले तारिफ गरेका छन् ।
शिक्षक आन्दोलन सुरु भएको साँझ अर्थात् गत बुधबार सामाजिक सञ्जाल फेसबुकमा काठमाडौं महानगरपालिकाका मेयर बालेन्द्र शाह (बालेन)ले फोहर नगरी र केही पनि संरचना तोडफोड नगरी आन्दोलन गरेको भन्दै धन्यवाद दिएका थिए ।
