इन्टरनेट सेवा प्रदायक हक नेटको लाइसेन्स खारेज
जेठ १९, २०८२ ९:३८
काठमाडौँ । इन्टरनेट सेवा प्रदायक हक नेट प्रालिको सेवा सञ्चालन अनुमति (लाइसेन्स) खारेज भएको छ । नियामक निकाय नेपाल दूरसञ्चार प्राधिकरणले हालै एक सूचना जारी गर्दै हक नेटलाई दिइएको इन्टरनेट (इमेल सहित) सेवाको अनुमतिपत्र रद्द भएको जानकारी दिएको हो ।
वीरगञ्ज महानगरपालिका-४, पर्सामा दर्ता रहेको हक नेट प्रा.लिलाई प्राधिकरणले ११ फागुन २०७२ मा अनुमतिपत्र प्रदान गरेको थियो । तर नवीकरणका लागि तोकिएको म्यादसम्म निवेदन नदिएपछि दूरसञ्चार ऐन, २०५३ को दफा २५ (५) अनुसार स्वतः अनुमतिपत्र खारेज भएको प्राधिकरणले उल्लेख गरेको छ ।
प्राधिकरणले सो कम्पनीसँग सम्बन्धित सबैलाई जानकारी गराउन सूचना जारी गरेको छ । साथै, कम्पनीले नियमानुसार तिर्न/बुझाउनुपर्ने रकमका लागि एक महिनाभित्र सम्पर्क गर्न भनिएको छ । निर्धारित म्यादभित्र सम्पर्क नगरेमा कानुनअनुसार कारबाही प्रक्रिया अघि बढाइने चेतावनी पनि दिइएको छ ।
पछिल्लो अध्यावधिक: जेठ १९, २०८२ ९:३९
