नेपाली बजारमा ३ हजार मूल्यमुनिका ६ इयरबड्स: कुन ब्रान्डको के विशेषता ?
फागुन १४, २०८२ १७:५३
काठमाडौँ । नेपाली बजारमा पछिल्लो समय कम बजेटमा गुणस्तरीय इयरबड्स खोज्ने उपभोक्ताहरूको संख्या बढ्दै गएको छ । विशेषगरी विद्यार्थी र कार्यालय जाने कर्मचारीहरूलाई लक्षित गर्दै विभिन्न ब्रान्डहरूले तीन हजार रुपैयाँ मुनिको मूल्यमा अत्याधुनिक फिचरसहितका इयरबड्सहरू उपलब्ध गराइरहेका छन् ।
यस मूल्य श्रेणीमा एङ्कर, रेड्मी र बोट जस्ता अन्तर्राष्ट्रिय ब्रान्डहरूसँगै अल्टिमा, एमडब्लूसी र एक्स एज जस्ता स्थानीय ब्रान्डहरूबिच कडा प्रतिस्पर्धा देखिएको छ ।
अन्तर्राष्ट्रिय ब्रान्डहरूमा एङ्करको ‘साउन्डकोर पी२० आई’ (P20i) र ए२०आई (A20i) अग्रपंक्तिमा देखिएका छन् । २,९९९ रुपैयाँ मूल्य तोकिएको पी२० आईमा १० एमएमको ड्राइभर र ब्लुटुथ ५.३ प्रविधि रहेको छ । यसको मुख्य विशेषता भनेको ‘साउन्डकोर एप’ मार्फत साउन्ड पर्सनलाइज गर्न मिल्ने र हराएको खण्डमा ‘फाइन्ड माई बड्स’ फिचरको उपलब्धता हो ।
त्यस्तै, साओमीको सहायक ब्रान्ड रेड्मीले १,९९९ रुपैयाँमै ‘रेडमी बड्स ६ प्ले’ (Redmi Buds 6 Play) उपलब्ध गराएको छ । १० एमएम डाइनामिक ड्राइभर र ब्लुटुथ ५.४ रहेको यस बड्समा पाँच ओटा इक्वेलाइजर मोडहरू दिइएको छ । बजेट सेगमेन्टमा मजबुत बनावट खोज्नेहरूका लागि बोटको ‘निर्भाना एयरडोप्स १६१’ एक विकल्प बनेको छ । यसमा गेमिङका लागि ‘बिस्ट मोड’ र स्पष्ट कलका लागि ईएनएक्स (ENX) प्रविधि प्रयोग गरिएको छ । यसको बजार मूल्य २,८९९ देखि ३,०९९ रुपैयाँको बीचमा रहेको छ ।
स्थानीय ब्रान्ड: कम मूल्यमा ‘एएनसी’ फिचर
नेपाली ब्रान्डहरूले भने अन्तर्राष्ट्रिय ब्रान्डको तुलनामा कम मूल्यमै एक्टिभ नोइज क्यान्सलेसन जस्ता प्रिमियम फिचरहरू प्रदान गरिरहेका छन् । अल्टिमाको ‘प्राइम १.०’ मात्र २,५९९ रुपैयाँमा उपलब्ध छ, जसमा १३ एमएमको ठुलो ड्राइभर र एएनसी सुविधा छ । कम्पनीले यसमा ६० घण्टासम्मको ब्याट्री ब्याकअप हुने दाबी गरेको छ ।
अर्को स्थानीय ब्रान्ड एमडब्लूसीको ‘कुलपड्स प्रो’ २,८०० रुपैयाँमा उपलब्ध छ । यसमा एएनसी र ईएनसीसहित चार ओटा माइक दिइएको छ, जसले कलको गुणस्तरलाई उत्कृष्ट बनाउँछ । त्यस्तै, एक्स एजको ‘कन्भे प्ले बड्स ३’ (ConvE Play Buds 3) पनि २,८३२ रुपैयाँमा उपलब्ध छ । यसमा गेमिङका लागि ४५ एमएसको लो लेटेन्सी र ब्लुटुथ ५.४ जस्ता सुविधा छन् ।
प्राविधिक पक्ष र छनोट
यस मूल्य श्रेणीका अधिकांश इयरबड्समा १० देखि १३ एमएमसम्मका ड्राइभरहरू प्रयोग भएका छन् । प्राविधिक रूपमा ड्राइभर जति ठुलो भयो, बास (Bass) र साउन्ड उत्ति नै लाउड हुने भए पनि साना ड्राइभरमा अडियो डिटेल्स (Audio Details) बढी स्पष्ट सुनिने विज्ञहरू बताउँछन् ।
उपभोक्ताले आफ्नो आवश्यकता अनुसार ब्रान्ड रोज्न सक्नेछन् । स्थापित ब्रान्ड र सफ्टवेयर अनुभव चाहनेका लागि एङ्कर वा रेड्मी उपयुक्त देखिन्छन् भने कम मूल्यमा एएनसी र बढी फिचर खोज्नेहरूका लागि नेपाली ब्रान्डहरू उत्कृष्ट विकल्प बनेका छन् । यी उत्पादनहरूमा ब्रान्ड अनुसार ६ महिनादेखि १ वर्षसम्मको वारेन्टी सुविधा उपलब्ध रहेको छ ।
पछिल्लो अध्यावधिक: फागुन १५, २०८२ १३:३४
