सबैभन्दा महँगोमा इन्टरनेट आयात गर्छ नेपाल टेलिकम, सस्तो भायनेट

काठमाडौं । नेपालमा आयात हुने इन्टरनेटको अन्तर्राष्ट्रिय ब्यान्डविथका लागि नेपाल टेलिकमले महँगो रकम खर्च गर्ने गरेको पाइएको छ । इन्टरनेट सेवाप्रदायक कम्पनी भायनेटको तुलनामा टेलिकमले आयात गर्ने इन्टरनेट ब्यान्डविथ दोब्बर महँगो छ ।

९० जीबीपीएस अन्तर्राष्ट्रिय ब्यान्डविथ आयात गर्ने भायनेटले त्यसका लागि प्रति एमबीपीएस मासिक ३.६ अमेरिकी डलर मात्र खर्चिने गरेको छ । तर ११२.३० जीबीपीएस ब्यान्डविथ आयात गर्ने नेपाल टेलिकमले भने प्रति एमबीपीएसका लागि ७.५ अमेरिकी डलर खर्चिने गरेको छ ।

भायनेटपछि सस्तो मूल्यमा इन्टरनेट ब्यान्डविथ ल्याउने कम्पनीहरूमा कम्युनिकेसन एन्ड कम्युनिकेसन (प्रति एमबीपीएस ३.७० डलर)टेकमाइन्ड (प्रति एमबीपीएस ३.८७५ डलर), वर्ल्डलिङ्क (प्रति एमबीपीएस ४.२० डलर), सुबिसु (प्रति एमबीपीएस ४.४० डलर), नेपाल डिजिटल सर्भिस (प्रति एमबीपीएस ४.६३ डलर), फर्स्टलिङ्क (प्रति एमबीपीएस ४.७० डलर) र क्लासिक टेक (प्रति एमबीपीएस ४.८० डलर) रहेका छन् ।

यस बाहेक एनसेल (प्रति एमबीपीएस ५.४१ डलर), ब्रोडलिङ्क ५.७२ डलर र अन्तिममा मर्कन्टाइल (प्रति एमबीपीएस २२.६० डलर) रहेको छ । मर्कन्टाइलले अप्टिकल फाइबरमार्फत नभई स्याटलाइट मार्फत ब्यान्डविथ आयात गर्ने भएकाले कम्पनीको रेट महँगो देखिएको हो ।

नेटवर्क सेवाप्रदायकको रुपमा रहेका कम्पनीहरूले विदेश स्थित विभिन्न बिक्रेताबाट अन्तर्राष्ट्रिय ब्यान्डविथ नेपाल आयात गर्दै आएका छन् । नेपाल दूरसञ्चार प्राधिकरणका अनुसार यसरी अन्तर्राष्ट्रिय ब्यान्डविथ आयात गर्ने नेटवर्क सेवाप्रदायक कम्पनीको सङ्ख्या १२ ओटा रहेको छ ।

यसरी ब्यान्डविथ आयात गर्ने धेरैजसो नेटवर्क सेवाप्रदायक स्वयम्‌ इन्टरनेट सेवाप्रदायकको रुपमा समेत रहेका छन् । अन्य इन्टरनेट सेवाप्रदायकले भने यिनै नेटवर्क सेवाप्रदायकबाट ब्यान्डविथ खरिद गरी इन्टरनेट सेवा उपलब्ध गराउँदै आएका छन् ।

पछिल्लो अध्यावधिक: असोज २, २०७९ २२:३२

टिप्पणीहरू