'नेक्स्ट जेनेरेसन लिडर्स २०२३' मा समावेश भए भारतीय युट्युबर ध्रुव राठी
असोज १९, २०८० २१:२३
काठमाडौं । सन् २०१४ मा ध्रुव राठीले आफ्नो युट्युब च्यानल सुरु गरे । आजको मितिसम्म आइपुग्दा आफ्नो च्यानलमा ५०० भिडिओ अपलोड गरेका उनले एक करोड ३० लाख सब्सक्राइबर बटुलिसकेका छन् ।
युट्युबर ध्रुव राठी यतिखेर टाइम म्यागेजिनको 'नेक्स्ट जेनेरेसन लिडर्स २०२३' मा सूचीकृत भएका छन् । राठी 'फ्याक्ट चेकिङ'र शैक्षिक सामग्री प्रस्तुत गर्ने कार्यका लागि चिनिने राठीले आफ्नो च्यानलमा विभिन्न विषय वस्तुमाथि भिडिओ बनाउँदै आएका छन् ।
२८ वर्षीय यी कन्टेन्ट क्रियटरले सामाजिक सञ्जाल एक्समा यो विषयलाई लिएर शुक्रवार खुसी साटेका छन् । "'टाइम म्यागेजिनको नेक्स्ट जेनेरेसन लिडर्स २०२३ । यो प्रतिष्ठित सूचीमा समावेश हुन पाउँदा अत्यन्तै सम्मानित महसुस गरिरहेको छु र भारतलाई अन्तर्राष्ट्रिय रूपमा चिनाउन पाउँदा गौरवान्वित समेत भएको छु । धन्यवाद," उनले भनेका छन् ।
TIME Magazine’s Next Generation Leaders 2023
— Dhruv Rathee (@dhruv_rathee) October 6, 2023
I’m honored to be included in this prestigious list and proud to represent India internationally.
Thank you ❤️ pic.twitter.com/aIT7J7z7EK
ध्रुवले सुरुवाती समयमा ट्राभल भ्लगको रूपमा आफ्नो युट्युब च्यानल सुरु गरेका थिए । यद्यपि भारतीयहरू इन्टरनेट कसरी प्रयोग गर्ने भन्ने विषयमा प्रशिक्षित नभएको र अनलाइनमा देखेका जुनसुकै कुरामा आँखा चिम्लेर विश्वास गर्ने गरेको महसुस भएपछि भने उनले फ्याक्ट चेकिङ अर्थात् सत्य तथा यथार्थ परीक्षण र सम्बन्धित भिडिओ बनाउन थालेको कुरा टाइम म्यागेजिनले उनलाई उद्धृत गर्दै लेखेको छ ।
"जटिल विषयवस्तुलाई साधारण शब्दमा टुक्राउने र सम्भव भएसम्म सजिलो गरी विषयवस्तु प्रस्तुत गर्ने मेरो उद्देश्य हो," उनले भनेका छन् । यी युट्यबुरले जब एक विवादास्पद फिल्म द केरला स्टोरीमा भिडिओ बनाएपछि उनी सञ्चार माध्यमका हेडलाइनहरूमा समेत छाएका थिए ।
राठीले भने अनुसार उनले फिल्ममा गरिएको दाबीको विरोध गर्न सरकारी आँकडाहरू प्रयोग गरेका थिए । तर उनलाई अनलाइनमा निकै ट्रोलको सिकार बनाइयो र उक्त भिडिओका लागि उनकी श्रीमतीलाई बलात्कारको धम्की सहितका प्रतिक्रियाको समेत सामना गर्नु पर्यो ।
"एउटा अर्को दृष्टान्त, तोडमोड गरिएको भारत प्रशासित कस्मिरको नक्सा समावेश गरेको दाबी गर्दै उनको भिडिओ त्यहाँको सूचना तथा प्रसारण मन्त्रालयबाट गत सेप्टेम्बरमा प्रतिबन्धित भएको थियो," म्यागेजिनले उल्लेख गरेको छ । भारतको हरियाणामा जन्मिएका राठीले जर्मनीमा मेकानिकल इन्जिनियरिङ पढेका छन् ।
आफ्नो युट्युब च्यानलको सफलतालाई लिएर उनी भन्छन्, "यति सामान्य चिजले पनि यत्तिका धेरै ध्यान खिच्न सक्छ भन्ने कुराले म अचम्मित छु... सायद कसैले पनि त्यो काम गर्ने कोसिसका लागि साहस नै गरेन कि ।"
पछिल्लो अध्यावधिक: असोज २०, २०८० १६:२९
