आईफोनलाई यसरी बनाउनुहोस् कम्प्युटरको वायरलेस माउस
माघ १३, २०८० १२:२
काठमाडौं । यदि तपाईंसँग ल्यापटप छ भने पक्कै पनि ट्रयाकप्याडको साटो माउस प्रयोग गर्न रुचाउनुहुन्छ होला । यदि तपाईं यात्राका क्रममा हुनु हुन्छ भने माउस प्याक गर्न बोझिलो महसुस हुन्छ र यत्तिकै छोडेर जान बेस लाग्छ ।
तर यदि तपाईंसँग आईफोन छ भने त्यसलाई सहजै वायरलेस माउसको रूपमा प्रयोग गर्न पनि सक्नुहुन्छ । तपाईंले यस्ता केही एपहरू फेला पार्न सक्नुहुन्छ, जसको सहयोगमा तपाईं म्याक, विन्डोज अथवा लिनक्स कम्प्युटरमा आईफोनलाई वायरलेस माउसको रूपमा प्रयोग गर्न सक्नुहुन्छ ।
आज हामी तपाईंलाई आईफोनलाई कसरी वायरलेस माउसको रूपमा प्रयोग गर्न सकिन्छ भन्ने बारेमा बताउँदै छौं ।
१. आईफोनलाई वायरलेस माउसको रूपमा प्रयोग गर्न एप इन्स्टल गर्नुहोस्
आफ्नो आईफोनलाई कम्प्युटरको वायरलेस माउस बनाउन सबैभन्दा पहिला तपाईंले एउटा उपयुक्त एप इन्स्टल गर्नुपर्ने हुन्छ । यस प्रकारको विकल्प दिने केही एपहरू तपाईंले फेला पार्न सक्नुहुन्छ ।
यस प्रकारको कुनै एउटा एप आफ्नो आईफोन र कम्प्युटरमा इन्स्टल गर्नुपर्ने हुन्छ । साथै यसका लागि तपाईंको कम्प्युटर र आईफोन एउटै वाईफाई नेटवर्कमा कनेक्ट भएको हुनु पर्छ ।
यहाँ पहिलो चरणमा यस्ता केही उत्कृष्ट एपहरूको कुरा गरौं, जसले आईफोनलाई माउसको रूपमा प्रयोग गर्न सकिने सुविधा दिने गरेका छन् ।
रिमोट माउस
तपाईंको आईफोनलाई वायरलेस माउस बनाउने सन्दर्भमा रिमोट माउस नामक एपले निकै राम्रो काम गर्छ । यति मात्र होइन, यसले तपाईंको आईफोनलाई ट्रयाकप्याडमा परिवर्तन गरिदिन पनि सक्छ ।
जसमा तपाईंले स्क्रोल, जुम लगायतका काम गर्न मल्टी-टच जेस्चर (म्याकको ट्रयाकप्याड जेस्चर जस्तै) को सुविधा पनि पाउन सक्नुहुन्छ । त्यसैले यस्तो एप म्याकका लागि आईफोनलाई वायरलेस माउसको रूपमा प्रयोग गर्न बढी रुचाउने गरिन्छ अर्थात् यो म्याक प्रयोगकर्ताका लागि बढी सहज हुन्छ ।
यसले तपाईंलाई कम्प्युटरमा आफ्नो आईफोन किबोर्ड प्रयोग गर्ने सुविधा पनि दिन्छ । यसमा तपाईंले फंसन कि र नम्बर प्याड समेत पाउन सक्नुहुन्छ, जुन तपाईंको कम्प्युटरको किबोर्डमा नहुन सक्छन् ।
यस अतिरिक्त रिमोट माउसमा कन्ट्रोल प्यानलको विशेषता पनि रहेको छ, जसले तपाईंलाई तुरुन्तै कम्प्युटरमा एप खोल्ने र ब्राउजरमा बुकमार्क गर्ने जस्ता कामहरू सहज बनाउँछ । यसका साथै यो एपले तपाईंलाई आईफोनको माइक्रोफोन प्रयोग गरी कम्प्युटरमा शब्द टाइप गर्ने जस्तो सुविधा पनि दिन्छ ।
मिडिया प्लेयर र रिमोट भोलुम कन्ट्रोल जस्ता फंसन किका लागि भने तपाईंलाई सब्सक्रिप्सन नै आवश्यक पर्छ, अन्यथा रिमोट माउस प्रयोगका लागि निःशुल्क छ र यो सेटअप गर्न पनि निकै सरल छ ।
यो एप तपाईंले आईफोनका साथै एन्ड्रोइडमा समेत पाउन सक्नुहुन्छ, जुन म्याक, विन्डोज र लिनक्स कम्प्युटरमा राम्रोसँग काम गर्छ । यस हिसाबले यसलाई युनिभर्सल एप समेत मान्न सकिन्छ ।
रिमोट माउस एप डाउनलोड गर्नका लागिः आईओएस । एन्ड्रोइड । म्याकओएस । विन्डोज । लिनक्स ।
मोबाइल माउस रिमोट
रिमोट माउस जस्तै मोबाइल माउस रिमोटले तपाईंको कम्प्युटरका लागि आईफोनलाई मल्टिटच ट्रयाकप्याडका साथै वायरलेस माउसको रूपमा प्रयोग गर्ने सुविधा दिन्छ । यसले क्विक एक्सनका लागि प्रोग्रामेबल हटकिसँगै तपाईंको आईफोनको किबोर्डलाई कम्प्युटरको किबोर्डको रूपमा प्रयोग गर्न समेत दिन्छ ।
यति मात्र नभएर यो एपले स्क्रिन टचका साथै कम्प्युटर कन्ट्रोल गर्न आईफोनको जाइरोस्कोपलाई उपयोग गर्ने सुविधा पनि दिन्छ । मोबाइल माउस रिमोटले छिटो छरितो रूपमा एप्लिकेसनहरू खोल्न, बन्द गर्न र एक अर्काबीच ओहोरदोहोर गर्न पनि दिन्छ ।
यसको सहयोगमा तपाईं आवश्यकता अनुसार कम्प्युटरका फाइलमा रिमोट्ली पुग्न पनि सक्नुहुन्छ । यो एप आईफोन, आईप्याड, म्याक र विन्डोजमा काम गर्छ ।
आईफ्नो आईफोनलाई म्याकको वायरलेस माउसको रूपमा प्रयोग गर्न चाहने प्रयोगकर्ताले यहाँनिर विचार गर्नुपर्ने कुरा के छ भने यसले हाललाई एप्पल सिलिकन म्याकमा मात्रै काम गर्छ । यो एप प्रयोग गर्न भने तपाईंले निश्चित शुल्क तिरेर सब्सक्रिप्सन लिनु पर्ने हुन्छ ।
२. आईफोन र कम्प्युटरमा रहेको वायरलेस माउस एपलाई जोड्नु होस्
एप छनोट गरिसकेपछि आईफोन र कम्प्युटरमा यसले काम गर्नका लागि केही चरणहरू पूरा गर्नुपर्ने हुन्छ । सुरुमा आफ्नो आईफोनमा एप इन्स्टल गर्न एप स्टोरमा जानुहोस् र चाहेको एप सर्च गर्नुहोस् ।
त्यहाँ तपाईंले रिमोट माउस र रिमोट मोबाइल माउस दुवै पाउन सक्नु हुनेछ, यद्यपि तपाईंले यसका लागि अन्य एप समेत फेला पार्न सक्नु हुनेछ । एपका लागि गेट अथवा बाई बटनमा ट्याप गर्नुहोस् र इन्स्टल निश्चित गर्नका लागि आफ्नो पासकोड अथवा फेसआईडी प्रयोग गर्न स्क्रिनमा दिइएको निर्देशन पच्छ्याउनु होस् ।
डाउनलोड भइसकेपछि एप खोल्नुहोस् । अब आफ्नो कम्प्युटरमा समेत तपाईंले सोही एपको सर्भर डाउनलोड गर्नुपर्ने हुन्छ । यो चाहिं तपाईंले सामान्यतया एपको वेबसाइटबाट गर्नुपर्ने हुन्छ, तर यदि तपाईं आफ्नो आईफोनलाई म्याकको माउसको रूपमा प्रयोग गर्न खोज्दै हुनु हुन्छ भने म्याक एप स्टोरमा जान पनि सक्नुहुन्छ ।
यदि तपाईं एपको वेबसाइटमा जानु भयो भने त्यहाँ आफ्नो कम्प्युटरको अपरेटिङ सिस्टम छनोट गर्नुहोस् र इन्स्टलेसन फाइल डाउनलोड गर्नुहोस् । अधिकांश म्याकका लागि तपाईंले डीएमजी फाइल पाउनु हुनेछ । विन्डोजका ईएक्सई फाइल र र लिनक्सका लागि टीएआर फाइल हुन सक्छ ।
अब डाउनलोड भएको फाइलमा डबल क्लिक गर्नुहोस् र आफ्नो कम्प्युटरमा सर्भर प्राप्त गर्न इन्स्टलरलाई रन गर्नुहोस् । तर यदि तपाईं म्याक एप स्टोरमार्फत जानु भयो भने गेट बटनमा क्लिक गर्नुहोस् र म्याकमा सर्भर प्राप्त गर्न इन्स्टल बटन दबाउनु होस् ।
यति गरिसकेपछि तपाईंले आफ्नो आईफोन र कम्प्युटर एउटै वाईफाई नेटवर्कमा रहेको कुरा निश्चित गर्नुपर्ने हुन्छ । त्यसपछि आफ्नो आईफोन र कम्प्युटरमा रहेको एप खोल्नुहोस् ।
तपाईंको आईफोन र कम्प्युटरले यहाँनिर ब्लुटुथ एक्सेसका साथै कनेक्ट हुने लोकल डिभाइस सर्च गर्ने अनुमति माग्न सक्छ । दुवैमा ओके बटन थिच्नुहोस्, यसरी इनेबल नगरी एपले काम गर्ने छैन ।
म्याकमा तपाईंले एप प्रयोग गर्न सेक्युरिटी पर्मिसन समेत अन गर्नुपर्ने हुन सक्छ । अब निम्न पर्मिसन अन गर्नुहोस्;
१. सिस्टम प्रिफरेन्सेस हुँदै सेक्युरिटी एन्ड प्राइभेसीमा जानुहोस् । त्यहाँ रहेको प्राइभेसी ट्याबमा क्लिक गर्नुहोस् र एक्सेसिबिलिटी मेनु छनोट गर्नुहोस् ।
२. लक आइकनमा क्लिक गर्नुहोस् र सेटिङ परिवर्तन गर्नका लागि आफ्नो पासवर्ड अथवा टच आईडी राख्नुहोस् ।
३. माउस एपलाई स्क्रोल गर्नुहोस् र सँगै रहेको बक्समा चेक गरी उक्त एपलाई आफ्नो कम्प्युटर नियन्त्रण गर्ने अनुमति दिनुहोस् । त्यसपछि सेटिङको परिवर्तन सेभ गर्न लकमा पुनः क्लिक गर्नुहोस् ।
यो सबै गरिसकेपछि तपाईंले आफ्नो आईफोन एपमा कुन कम्प्युटर अथवा डिभाइसमा माउसको रूपमा कनेक्ट गर्ने भन्ने विकल्प देख्नु हुनेछ । सर्भर इन्स्टल गरेको कम्प्युटर छान्नुहोस् ।
यति गरिसकेपछि अब तपाईं यहाँबाट आफ्नो आईफोनको स्क्रिनलाई माउसको रूपमा प्रयोग गर्न सक्नुहुन्छ । यद्यपि एपअनुसार वायरलेस माउसका लागि दिइएका वास्तविक निर्देशन यहाँ उल्लेख गरिएभन्दा केही फरक हुन सक्छन् ।
तर तपाईंले सामान्यतया सजिलै सेटअप गर्न सक्नु हुनेछ । वायरलेस माउसको रूपमा प्रयोग गरिसकेपछि त्यसलाई बन्द गर्न आफ्नो आईफोन र कम्प्युटरमा रहेको एप बन्द गर्नुहोस् ।
पछिल्लो अध्यावधिक: माघ १३, २०८० १२:२
