close

सामसङ ग्यालेक्सी एस२५ ले एआईमा तहल्का मच्चाउने

टेकपाना टेकपाना

पुस २०, २०८१ १७:३८

सामसङ ग्यालेक्सी एस२५ ले एआईमा तहल्का मच्चाउने

काठमाडौं । सामसङको ग्यालेक्सी एस२५ सिरिज ‍एआई फिचरले भरिपूर्ण हुने भएको छ । हालै बाहिरिएका विभिन्न सूचना अनुसार एआईलाई नयाँ उचाइ दिन सामसङले विभिन्न फिचर पस्कने छ ।

यसमा पहिलेका लोकप्रिय फिचरहरू नोट असिस्ट, इन्टरप्रेटर, लाइभ ट्रान्सलेट, म्याजिक कम्पोज, फोटो एडिटिङ टुल लगायतका सुविधा यथावत् हुनेछन् । एस२५ सिरिजमा थप फिचर ल्याई एप्पल लगायतका प्रतिस्पर्धी कम्पनीहरूलाई पछि पार्ने ध्याउन्नमा सामसङ छ । 

प्रविधि सम्बन्धी जानकारी दिने विश्वसनीय लिकर आइस युनिभर्स (@UniverseIce) ले सामाजिक सञ्जाल एक्समा लेखेका छन्, "सामसङ ग्यालेक्सी एस२५ ले एप्पललाई एआईको नेतृत्व कसरी गरिन्छ भनेर देखाउनेछ । एस२५ मा धेरै नयाँ एआई सुविधाहरू अहिलेसम्म बाहिर आएको छैन, जुन मलाई धेरै अनौठो लागेको छ ।​"

आइस युनिभर्सले ग्यालेक्सी एस२५ का एआई फिचरहरू अझै गोप्य राखिएकोमा छेडखानी गरेका छन् । पहिलेका रिलिजहरूमा विवरणहरू प्रायः अगाडि नै लिक हुन्थे । तर सामसङले अहिले आफ्नो लन्च इभेन्टलाई कौतुहल बनाउन खोजेको देखिन्छ । आईफोनलाई चुनौती दिने गरी एआई फिचरमार्फत क्रान्तिकारी परिवर्तन ल्याउनतर्फ सामसङ अग्रसर भएको विश्लेषण गरिएको छ ।

विभिन्न स्रोत अनुसार, सामसङ ग्यालेक्सी एस२५ प्रयोगकर्ताले फोनबाटै छिटोछिटो टेक्स्ट, इमेज र भिडिओहरू बनाउन सक्नेछन् । त्यस्तै फोटो खिच्दा एआईले तुरुन्तै कस्तो सेटिङमा खिच्दा राम्रो हुन्छ भनेर बुझेर त्यसैअनुसार फोटो खिच्न मद्दत गर्नेछ । एआईले नै फोनमा कुन एप कति बेला चलाउने, कुन एपहरू महत्त्वपूर्ण छन् र तपाईंलाई कस्ता सेटिङहरू मन पर्छ भनेर बुझेर फोनलाई त्यहीअनुसार चलाउनेछ । त्यस्तै, एआईले नै फोनमा कुनै खतरा छ कि छैन भनेर पत्ता लगाउनेछ ।

एआईबाटै फ्लाइट टिकट बुक गर्नेदेखि खाना अर्डर गर्ने जस्ता काम गर्न सकिने हल्ला पनि चलेको छ । ग्यालेक्सी एस२५ मा प्रयोग गरिने नयाँ सफ्टवेयर (One UI 7) र प्रोसेसर (Snapdragon 8 Elite)ले फोनलाई अझै शक्तिशाली एआई प्रयोग गर्न सक्षम बनाउने विश्लेषण गरिएको छ । 

ग्यालेक्सी एस२५ का यी नयाँ फिचरहरू पुराना सामसङ डिभाइसमा उपलब्ध हुने वा नहुने भने अहिले स्पष्ट छैन । सामसङले आउँदो २२ जनवरीमा अनप्याक्ड इभेन्टमार्फत ग्यालेक्सी एस२५ सिरिज लगायतका उत्पादन सार्वजनिक गर्दैछ ।

पछिल्लो अध्यावधिक: पुस २०, २०८१ १८:१७