अमेरिकामा कसले हात पार्ला टिकटकको स्वामित्व ?
माघ १३, २०८१ २२:२६
काठमाडौं । संसारभरि ‘मिस्टर बिस्ट’ का नामले चिनिने जिम्मी डोनाल्डसन अमेरिकामा टिकटकको स्वामित्व खरिद गर्न इच्छुक देखिएका छन् । सामाजिक सञ्जालमा ठूला फ्यान फलोइङ भएका जिम्मीले आफ्ना लाखौं टिकटक फलोअरहरूसँग एक पोस्टमार्फत भनेका छन्, “म तपाईँहरूको नयाँ सीईओ बन्न सक्छु । म निकै उत्साहित छु ।”
जिम्मीले आफ्ना पाँच नयाँ फलोअरलाई १० हजार डलर (झन्डै १३ लाख ७६ हजार रुपैयाँ) दिने बाचा पनि गरेका छन् । उनको यो पोस्ट ८ करोडभन्दा बढी पटक हेरिएको छ । यद्यपि उनले आफ्नो योजना विस्तारमा खुलाएका छैनन् र भनेका छन्, “यसले सबैलाई चकित पार्नेछ ।”
जिम्मी डोनाल्डसनमात्र नभई अन्य धेरैले पनि टिकटक खरिद गर्न चासो देखाएका छन् । टिकटकको मातृ कम्पनी चीनको बाइटडान्स हो । तर अमेरिकामा पछिल्लो समय टिकटकलाई प्रतिबन्ध गर्ने वा स्वामित्व अमेरिकी नागरिककै हातमा दिनुपर्ने विषयमा बहस भइरहेको छ ।
गत वर्ष तत्कालीन राष्ट्रपति जो बाइडेनले एउटा कानुनमा हस्ताक्षर गरेका थिए, जसले बाइटडान्सलाई २०२४ को जनवरी १९ सम्म टिकटकको स्वामित्व बेच्न वा अमेरिकामा प्रतिबन्ध सामना गर्न निर्देशन दिएको थियो । यो निर्णय अमेरिकाको राष्ट्रिय सुरक्षाका लागि लिइएको भनिएको छ ।
नवनिर्वाचित राष्ट्रपति डोनाल्ड ट्रम्पले टिकटकका लागि संयुक्त स्वामित्वको सम्भावना अघि सारेका छन् । “म चाहन्छु कि अमेरिकाले टिकटकमा ५०% स्वामित्व लियोस्,” ट्रम्पले भनेका छन्, “यसले टिकटक सही व्यक्तिको हातमा पुग्छ र यसको सञ्चालन निरन्तर रहन्छ ।”
ब्लुमबर्गको रिपोर्टअनुसार, चीनले टिकटक एलन मस्कलाई बेच्न प्रस्ताव गर्न सक्ने सम्भावना रहेको बताइएको छ । सामाजिक सञ्जाल एक्स (पहिलेको ट्वीटर) का मालिक समेत रहेका मस्क टिकटक प्रतिबन्धको विपक्षमा देखिएका छन् । उनले हालै सामाजिक सञ्जालमा भनेका थिए, “अहिलेको अवस्था असन्तुलित छ । टिकटकलाई अमेरिकामा सञ्चालन गर्न दिइएको छ, तर एक्स लाई चीनमा अनुमति छैन । यसमा केही परिवर्तन आवश्यक छ ।”
ट्रम्पले पनि मस्कलाई टिकटक खरिद गर्न समर्थन गर्ने संकेत गरेका छन् । उनले भने, “म चाहन्छु कि एलनले खरिद गरून् । ल्यारी (ओरेकलका अध्यक्ष ल्यारी एलिसन) ले पनि खरिद गरून् भन्ने चाहन्छु ।” ओरेकल टिकटकका मुख्य सर्भर प्रदायकहरूमध्ये एक हो, जसले टिकटकको डेटा भण्डारण व्यवस्थापन गर्छ ।
अर्बपति लगानीकर्ता फ्र्यांक म्याककोर्टले पनि टिकटक खरिदमा चासो देखाएका छन् । उनले टिकटकलाई आफ्नो 'प्रोजेक्ट लिबर्टी' प्रविधि अन्तर्गत चलाउने प्रस्ताव गरेका छन् । तर उनले टिकटकको एल्गोरिदम वा चिनियाँ प्रविधि उपयोग नगर्ने बताएका छन् ।
विशेषज्ञहरूका अनुसार टिकटकको वास्तविक मूल्य यसको शक्तिशाली एल्गोरिदममा निर्भर गर्छ । जर्जटाउन विश्वविद्यालयका कानुन प्राध्यापक अनुपम चान्डरले भनेका छन्, “ट्रम्पले कसलाई प्राथमिकतामा राख्छन् भन्ने कुरा टिकटक खरिदकर्ताको छनोटलाई प्रभाव पार्न सक्छ ।”
टिकटकको स्वामित्वको विषय राजनीतिक र कानुनी बहसको घेरामा छ । यसले चर्चित यो सामाजिक सञ्जालको भविष्य कतातर्फ जाने हो भन्ने अन्योल कायम राखेको छ । अब टिकटकको भाग्यले कस्तो मोड लिन्छ भन्ने हेर्न बाँकी छ ।
पछिल्लो अध्यावधिक: माघ १३, २०८१ २२:३५
