२०२६ को अन्तिममा मङ्गल ग्रहमा पहिलो मिसन प्रक्षेपण गर्ने मस्कको घोषणा
चैत ३, २०८१ १२:१४
काठमाडौं । टेस्ला र स्पेसएक्सका मालिक एलन मस्कले स्पेसएक्सको स्टारशिप रकेट २०२६ को अन्त्यसम्ममा मङ्गल ग्रहको पहिलो मिशनमा जाने बताएका छन् । शनिबार सामाजिक सञ्जाल एक्समा एक पोस्ट राख्दै मस्कले आगामी वर्षको अन्तिममा आफ्नो महत्त्वाकाङ्क्षी योजना सार्वजनिक गरेका हुन् ।
पछिल्लो समय स्पेस एक्सका रकेट उडान परीक्षणका क्रममा शृङ्खलाबद्ध रूपमा विस्फोट भइरहेका छन् । त्यही रकेट विस्फोटका घटनाको अनुसन्धान भइरहेको बेला मस्कले आगामी वर्षको अन्तिममा अप्टिमस रोबोट बोकेर स्टारशिप प्रक्षेपणको घोषणा गरेका हुन् ।
मस्कले आफ्नो सामाजिक सञ्जाल प्लेटफर्म एक्समा लेख्दै प्रारम्भिक मिसनहरू सफल भएमा सन् २०२९ सम्ममा मानिसहरू मङ्गल ग्रहमा उत्रिन सक्ने र सन् २०३१ सम्ममा यो सम्भावना अझ बढ्ने बताएका छन् ।
१२३ मिटर अग्लो स्टारशिप रकेट मस्कको मङ्गल ग्रहलाई उपनिवेश बनाउने महत्त्वाकाङ्क्षाको लागि महत्त्वपूर्ण मानिएको छ । तर, परीक्षणका क्रममा यसले धेरै असफलता भोगेको छ । गत साता टेक्ससबाट प्रक्षेपण गरिएको रकेट परीक्षणको क्रममा केही मिनेटमै विस्फोट भएको थियो । यसअघि जनवरीमा पनि यस्तै विस्फोट भएको थियो ।
पछिल्लो समय रकेट विस्फोटको कारण पत्ता लगाउन स्पेसएक्सले डेटाको समीक्षा गर्ने बताएको छ । अमेरिकाको सङ्घीय उड्डयन प्रशासन (एफएए) ले स्पेसएक्सलाई पुन: उडान गर्नुअघि अनुसन्धान गर्नुपर्ने बताएको छ ।
Starship departs for Mars at the end of next year, carrying Optimus.
— Elon Musk (@elonmusk) March 15, 2025
If those landings go well, then human landings may start as soon as 2029, although 2031 is more likely. https://t.co/JRBB95sgNN
नासाले चन्द्रमामा फर्कने आर्टिमिस मिसनका लागि स्टारशिपको परिमार्जित संस्करणलाई ह्युमन लुनार ल्यान्डरको रूपमा प्रयोग गर्ने अपेक्षा गरेको छ ।
मस्कले यो रकेट प्रणालीले एक दिन मानिसलाई चन्द्रमा र त्यसपछि मङ्गल ग्रहमा पुर्याएर मल्टी प्लानेटरी (बहु-ग्रहीय) बनाउने लक्ष्य राखेका छन् । यसअघि सन् २०१६ मा मस्कले सन् २०१८ सम्ममा आफ्नो ड्रागन यान पठाउने योजना बनाएको बताएका थिए ।
सन् २०२० मा उनले सन् २०२४ मा मङ्गल ग्रहका लागि यान प्रक्षेपण गर्ने र ६ वर्षभित्र त्यहाँ मानिसलाई ओराल्नेमा आफू विश्वस्त रहेको बताएका थिए । तर अब सन् २०२६ मा मात्रै मङ्गल ग्रहमा पहिलो स्टारशिप प्रक्षेपण गर्ने र अबको चार वर्षमा चालक दलसहितको उडान गर्ने योजना बनाएका छन् ।
मस्कले आगामी मङ्गल ग्रह मिसनमा टेस्लाको ह्युमनोइड रोबोट ‘अप्टिमस’ लाई पनि लैजाने बताएका छन् । उक्त रोबोटले दैनिक काम गर्न सक्ने र यसको मूल्य २०,००० देखि ३०,००० अमेरिकी डलरसम्म पर्ने बताइएको छ ।
यसैबिच स्पेसएक्सले शुक्रबार अन्तर्राष्ट्रिय अन्तरिक्ष स्टेसन (आईएसएस) मा चालक दल पठाउन फाल्कन ९ रकेट प्रक्षेपण गरेको छ । सो रकेटमार्फत नौ महिनादेखि अन्तरिक्षमा फसेका बुच विल्मोर र सुनिता विलियम्सलाई फिर्ता ल्याइने बताइएको छ ।
पछिल्लो अध्यावधिक: चैत ३, २०८१ १२:२२
