close

एनपीएलमा खेलाडीले चौका हान्दा विद्यार्थीको हातमा पुग्यो शैक्षिक सामग्री

टेकपाना टेकपाना

चैत ७, २०८१ १२:३

एनपीएलमा खेलाडीले चौका हान्दा विद्यार्थीको हातमा पुग्यो शैक्षिक सामग्री

काठमाडौं । नेपाल प्रिमियर लिग (एनपीएल) २०२४ का चौकालाई शिक्षासँग जोड्ने उद्देश्यका साथ एनसेल फाउन्डेसनले विद्यार्थीहरूलाई शैक्षिक सामग्री वितरण गर्न थालेको छ । यसअन्तर्गत मंगलबार लुम्बिनी प्रदेशका तीन विद्यालयका ४४६ जना विद्यार्थीलाई शैक्षिक सामग्री वितरण गरिएको छ ।

क्रिकेटको रोमाञ्चकतासँग शिक्षालाई जोड्ने यो पहल अन्तर्गत एनपीएल खेलहरूमा हानिएका प्रत्येक चौकाबापत चार ओटा शैक्षिक सामग्री प्रदान गरिने कम्पनीले जनाएको छ । गत मंसिरमा घोषणा गरिएको यो अभियानले विद्यार्थीहरूको सिकाइलाई प्रवर्द्धन गर्दै शिक्षा क्षेत्रमा सकारात्मक योगदान पुर्‍याउने कम्पनीको लक्ष्य छ ।

एनसेलका प्रमुख कार्यकारी अधिकृत जाब्बोर कायुमोभ, नेपाल क्रिकेट संघ (क्यान)का सचिव पारस खड्का, लुम्बिनी लायन्सका अध्यक्ष ईश्वर जिसी र एनसेलकी मार्केटिङ, कम्युनिकेसन एन्ड सस्टेनिबिलिटी अन्तरिम निर्देशक विषाखा लक्ष्मी खड्काले कपिलवस्तु नगरपालिका–१० स्थित श्री राष्ट्रिय माध्यमिक विद्यालय र मदरसा वहरुल उलूमका २६० जना विद्यार्थीलाई शैक्षिक सामग्री हस्तान्तरण गरे ।

त्यसैगरी एनसेलका चिफ अफ स्टाफ स्टिवन रोड्रिगेजले राप्ती सोनारी गाउँपालिका–४ को श्री बालकशान्ति प्राथमिक विद्यालयका १८६ जना विद्यार्थीलाई सामग्री वितरण गरे ।

विद्यार्थीहरूले प्राप्त गरेका शैक्षिक सामग्रीहरूमा स्कुल ब्याग, कापी, सिसाकलम, इरेजर, कटर लगायतका आवश्यक सामग्रीहरू समावेश छन् ।

“गुणस्तरीय शिक्षा प्रत्येक बालबालिकाको आधारभूत अधिकार हो । एनसेल फाउन्डेसनमार्फत विद्यार्थीहरूलाई आवश्यक शैक्षिक सामग्री उपलब्ध गराउन पाउँदा हामी निकै खुशी छौं । यस पहलले शैक्षिक स्रोतको अभाव कम गर्दै विद्यार्थीहरूलाई शिक्षामा प्रोत्साहन गर्नेछ,” प्रमुख कार्यकारी अधिकृत कायुमोभले भने ।

क्यानका सचिव  खड्काले पनि एनसेलको अभियानप्रति प्रशंसा व्यक्त गर्दै भने, “क्रिकेटलाई शिक्षासँग जोड्दै विद्यार्थीहरूलाई सहयोग गर्ने एनसेलको यो सीएसआर (व्यावसायिक सामाजिक उत्तरदायित्व) कार्यक्रम प्रेरणादायी छ । विद्यार्थीहरूसँग समय बिताउन पाउँदा म अत्यन्तै खुशी छु ।”

एनपीएलमा हानिएका ६५३ चौका अनुसार कुल २६१२ शैक्षिक सामग्री वितरण गरिने एनसेलले जनाएको छ । कपिलवस्तुका दुई विद्यालयले एनसेल फाउन्डेसनको फेसबुक पेजमार्फत सहयोग अनुरोध गरेका थिए भने श्री बालकशान्ति विद्यालयले एनसेलको नेपालगञ्ज कार्यालयमार्फत अनुरोध गरेको थियो ।

एनसेलकी मार्केटिङ, कम्युनिकेशन एन्ड सस्टेनिबिलिटी अन्तरिम डाइरेक्टर विषाखा लक्ष्मी खड्काले यस अभियानलाई निरन्तरता दिने योजना सुनाउँदै भनिन्, “हामी यस पहलमा देखिएको उत्साहजनक प्रतिक्रियाबाट हर्षित छौं । क्यानजस्ता साझेदारहरूसँग मिलेर देशभरका विद्यार्थीहरूलाई शैक्षिक सामग्री उपलब्ध गराउन निरन्तर काम गर्नेछौं ।”

पछिल्लो अध्यावधिक: चैत ७, २०८१ १२:११