एप्पलका दुर्लभ उत्पादन लिलामीमा, एप्पल-१ कम्प्युटरको मूल्य ४ करोड रुपैयाँ बढी

काठमाडौं । एप्पलले बनाएका केही दुर्लभ सामान, पुराना डिभाइस, प्रयोगमा नआएका प्रोटोटाइप र स्टिभ जब्सले हस्ताक्षर गरेका कागजात लिलामीमा राखिएको छ । बिहीबार एप्पलसँग सम्बन्धित विभिन्न सामग्री आरआर अक्सनले लिलामीका लागि बिक्रीमा राखेको हो । 

लिलामीमा राखिएकामध्ये एउटा प्रडक्ट हो, एप्पल-१ कम्प्युटर । यसको लिलामी मूल्य तीन लाख डलर (करिब चार करोड १९ लाख रुपैयाँ) सम्म पुग्न सक्ने अनुमान गरिएको छ । यस उपकरणलाई ‘बेभिल्ले’ एप्पल-१ भनेर चिनिन्छ । र, यो एप्पल-१ रजिस्ट्रीमा ९१ नम्बरमा रहेको छ ।

एप्पल-१ एप्पलका सह-संस्थापक स्टिभ जब्स र स्टिभ वोज्नियाकले बेचेको पहिलो कम्प्युटर थियो । यी उपकरण सीमित सङ्ख्यामा बिक्री भएकाले बजारमा सीमित सङ्ख्यामा छन् ।

एप्पल-१ राम्रो अवस्थामा छ भने यसको बोर्डमा स्पष्ट लेबलिङ देख्न सकिन्छ । यो एप्पलका कर्मचारी नम्बर १२ डेनियल कोट्केद्वारा हस्तलिखित नोटसहितको ओरिजिनल पुस्तिकासँग आउने बताइएको छ ।

स्टिभ जब्सले हस्ताक्षर गरेका दुई चेक पनि लिलामीमा छन् । ती चेकको मूल्य २५ हजार डलर (करिब ३४ लाख ९२ हजार रुपैयाँ) भन्दा बढी पुग्न सक्ने अनुमान छ । त्यसैगरी रेभ. ० लोजिक बोर्ड र भेन्टलेस केससहितको दुर्लभ एप्पल डबल आई कम्प्युटरको मूल्य ३० हजार डलरसम्म पुग्न सक्ने अनुमान गरिएको छ ।

धेरै ईभीटी (इन्जिनियरिङ भ्यालिडेसन टेस्ट) प्रोटोटाइप डिभाइस पनि लिलामीमा छन् । खासगरी पारदर्शी केसमा म्याकिन्टोस पोर्टेबल लिलामीमा राखेको वेबसाइटमा देख्न सकिन्छ । म्याकिन्टोस पोर्टेबल सन् १९८९ मा जारी गरिएको थियो । यो एप्पलको पहिलो ब्याट्रीबाट चल्ने ल्यापटप थियो । 

१६ पाउण्डभन्दा बढी तौल भएको र महँगो भएकाले यो खासै सफल हुन सकेन । त्यसैले यो थोरै सङ्ख्यामा उपलब्ध भयो । त्यसमाथि प्रोटोटाइप पारदर्शी केस भएका त झनै कम छन् । यसको दुर्लभताका कारण यसको मूल्य ५० हजार डलरभन्दा बढीमा बिक्री हुन सक्ने अनुमान गरिएको छ ।

यसका साथै आईपड क्लासिक, आईम्याक जी थ्री, पावर म्याक जी फोर क्युब, पावर म्याकिन्टोस र म्याकिन्टोस टिभीका ईभीटी वा पीभीटी भर्सन पनि लिलामीमा छन् । यी प्रडक्टको मूल्य हजारौं डलरमा पुग्न सक्ने बताइएको छ । लिलामीमा राखिएका सबै एप्पल डिभाइस आरआर अक्सनको साइटमा फेला पार्न सकिन्छ ।

पछिल्लो अध्यावधिक: फागुन १७, २०८१ १७:१७

टिप्पणीहरू