अब नेपाली व्यवसायीले विदेशीलाई वस्तु तथा सेवा बिक्री गर्दा पनि डिजिटल वालेटमै पैसा लिन पाउने

काठमाडौं । नेपाली व्यवसायीहरूले वस्तु तथा सेवा बिक्री गरेबापत विदेशी मुद्रा डिजिटल वालेटमा लिन सक्ने भएका छन् । नेपाल राष्ट्र बैंकले विदेशी विनिमय व्यवस्थापन विभागको एकीकृत परिपत्र-२०८१ जारी गर्दै यो व्यवस्था गरेको हो ।

नयाँ व्यवस्था अनुसार नेपाली व्यवसायीहरूले विदेशमा जारी भएका भुक्तानीका उपकरणबाट क्यूआर कोड लगायतका विद्युतीय माध्यममार्फत विदेशी मुद्रा स्वीकार गर्न सक्नेछन् । राष्ट्रिय भुक्तानी स्विच पूर्ण रूपमा सञ्चालनमा नआएसम्म रिटेल पेमेन्ट स्विचमार्फत यो सुविधा प्रयोग गर्नुपर्ने परिपत्रमा उल्लेख छ ।

विदेशी विनिमयको कारोबार गर्न इजाजतपत्र नलिएका वित्तीय संस्था र भुक्तानी सेवा प्रदायकको खाता/वालेटमा पनि भुक्तानी प्राप्त गर्न सकिनेछ । तर, यस्ता संस्थाले नेपाली सेटलमेन्ट बैंकमार्फत विदेशी मुद्रा प्राप्त गर्न पाउने छैनन्, नेपाली रुपैयाँमा मात्र कारोबार गर्नुपर्नेछ ।

यस कारोबारमा हुने सबै जोखिमहरू र त्यसको व्यवस्थापन सम्बन्धित बैंक, वित्तीय संस्था र भुक्तानी सेवाप्रदायकले नै गर्नुपर्ने परिपत्रमा उल्लेख छ ।

पछिल्लो अध्यावधिक: चैत २२, २०८१ १९:२३

टिप्पणीहरू