सफ्टवेरिका कलेज अफ आईटी एन्ड ईकमर्सले आर्टिफिसियल इन्टेलिजेन्स (एआई), रोबोटिक्स र साइबर सुरक्षासम्बन्धी परियोजनाहरूको प्रदर्शनी 'टेक एक्स २०२४' आयोजना गर्ने भएको छ । स्नातक तहमा अध्ययनरत विद्यार्थीहरूले तयार पारेका विभिन्न परियोजनाहरू प्रदर्शन गर्ने गरी कलेजले ‘टेक एक्स २०२४’ आयोजना गर्ने भएको हो । 

यही १५ देखि २० साउनसम्म चल्ने यो प्रदर्शनी कलेजको आफ्नै प्राङ्गणमा हुने भएको छ । प्दरर्शनीमा एआई रोबटिक टिचर, बैङ्किङ रोबट, टुर गाइड रोबट, रोबट फूटबल, एआई असिस्टेन्ट फर आई हस्पिटल, रोबोटिक वेटर, रोबोट वारलगायतका ३० भन्दा बढी रचनात्मक परियोजनाहरू रहने कलेजले जनाएको छ । त्यस्तै प्रदर्शनीमा रोबोटिक डग, लाइब्रेरी तथा एयरपोर्ट सम्बन्धी असिस्टेन्ट एआई रोबोट र गोदाम व्यवस्थापनको अर्धस्वचालित प्रविधि अवलोकन गर्न पाइने बताइएको छ ।